തിരുവനന്തപുരം: പോലീസുദ്യോഗസ്ഥര് വിവാദ വ്യവസായികളും കളങ്കിത വ്യക്തികളുമായുമുള്ള ചങ്ങാത്തം ഒഴിവാക്കണമെന്നും ഇത്തരം അവിശുദ്ധബന്ധം കണ്ടെത്തിയാല് കര്ശന നടപടിയുണ്ടാവുമെന്നും മുഖ്യമന്ത്രിയുടെ താക്കീത്. ഇന്നലെ പോലീസ് ആസ്ഥാനത്ത് ഉദ്യോഗസ്ഥരുമായി നടത്തിയ ആശയവിനിമയത്തില് മുപ്പതോളം നിര്ദ്ദേശങ്ങള് നല്കി. ജനങ്ങളോടുള്ള പെരുമാറ്റം മാന്യമായിരിക്കണം. ജനങ്ങള് സര്ക്കാരിനെ വിലയിരുത്തുന്നത് പോലീസിന്റെ പെരുമാറ്റം കൂടി കണ്ടാണ്. എല്ലാ പരാതികള്ക്കും രസീത് നല്കണം. 112എന്ന നമ്പറില് വിളിച്ചാലുടന് സഹായം ലഭ്യമാക്കണം. സ്ത്രീകള്, കുട്ടികള്, മുതിര്ന്ന പൗരന്മാര് എന്നിവരുടെ പരാതികളില് ഉടന് നടപടി വേണം. ലോക്കപ്പിലെ മൂന്നാംമുറ അംഗീകരിക്കില്ല. ആഭ്യന്തര സെക്രട്ടറി വി.വേണു, മുഖ്യമന്ത്രിയുടെ പ്രൈവറ്റ് സെക്രട്ടറി കെ.കെ.രാഗേഷ്, പൊളിറ്റിക്കല് സെക്രട്ടറി പി.ശശി, ജില്ലാ പോലീസ് മേധാവികള് തുടങ്ങിയവര് യോഗത്തില് പങ്കെടുത്തു.
