പത്തനംതിട്ട : ജില്ലാ പോലീസ് ആസ്ഥാനത്തും വിവിധ പോലീസ് സ്റ്റേഷനുകളിലും യോഗദിനത്തോടനുബന്ധിച്ച് യോഗാ ക്ലാസുകൾ നടന്നു. ജില്ലാ പോലീസ് ആസ്ഥാനത്തെ വിവിധ യൂണിറ്റുകളിലെയും സായുധ ക്യാമ്പിലെയും മുതിർന്ന ഓഫീസർമാർ ഉൾപ്പെടെയുള്ള പോലീസുദ്യോഗസ്ഥർ പങ്കെടുത്തു. രാവിലെ 7.30 ന് തുടങ്ങിയ ഒരു മണിക്കൂർ നീണ്ട യോഗ പരിശീലനം ജില്ലാ പോലീസ് മേധാവി സ്വപ്നിൽ മധുകർ മഹാജൻ ഐപിഎസ് ഉദ്ഘാടനം ചെയ്തു.
ലോകത്തിന് ഭാരതത്തിന്റെ മികച്ച സംഭാവനകളിൽ ഒന്നായ യോഗ ഐക്യരാഷ്ട്രസഭയിൽ അവതരിപ്പിക്കപ്പെട്ടതിലൂടെ യോഗയെന്ന പ്രാചീന ശാരീരിക മാനസിക ആത്മീയ അനുഷ്ഠാനം രാജ്യത്തിന്റെ യശസ്സ് ഉയർത്തി. മനസ്സും ശരീരവും ശുദ്ധമാക്കി ആരോഗ്യം ഉറപ്പാക്കുന്നതിന് ഏറ്റവും മികച്ചമാർഗമാണ് യോഗ. ആയതിനാൽ എല്ലാ പോലീസുദ്യോഗസ്ഥരും യോഗാമുറകൾ ജീവിതത്തിൽ നിലനിർത്തണമെന്ന് ജില്ലാ പോലീസ് മേധാവി അഭിപ്രായപ്പെട്ടു.
റിട്ടയേർഡ് എസ് ഐ ഷുക്കൂർ പരിശീലന ക്ലാസ്സിന് നേതൃത്വം നൽകി. അമ്പതോളം പേർ പങ്കെടുത്ത ക്ലാസ്സിൽ ജില്ലാ പോലീസ് മേധാവി ആദ്യാവസാനം പങ്കെടുത്തത് പോലീസ് ഉദ്യോഗസ്ഥർക്ക് ആവേശം പകർന്ന് നൽകി. സ്പെഷ്യൽ ബ്രാഞ്ച് ഡി വൈ എസ് പി പി കെ സാബു, ഡി സി ആർ ബി ഡി വൈ എസ് പി എസ് വിദ്യാധരൻ, ജില്ലാ ക്രൈം ബ്രാഞ്ച് ഡി വൈ എസ് പി ജെ ഉമേഷ് കുമാർ തുടങ്ങിയ യൂണിറ്റ് മേധാവികളും പങ്കെടുത്തു.
