കോന്നി : കൂടൽ ഉദയ ജങ്ഷന് സമീപം പതിനെട്ടുകാരനെ വീടിനുള്ളിൽ തൂങ്ങിമരിച്ച നിലയിൽ കണ്ടെത്തി. വെട്ടുവിള പടിഞ്ഞാറ്റേൽ അഭിൽ ശിവദാസനെയാണ് മരിച്ച നിലയിൽ കണ്ടെത്തിയത്. ശനിയാഴ്ച ഉച്ചയോടെയായിരുന്നു സംഭവം. പ്ലസ് ടു പഠനം പൂർത്തിയാക്കിയ അഭിൽ കലഞ്ഞൂരിലെ ഒരു പെട്രോൾ പമ്പിൽ ജീവനക്കാരനായി ജോലി നോക്കി വരികയായിരുന്നു. മരണപ്പെടുന്നതിന് തൊട്ടുമുമ്പ് അഭിൽ തന്റെ സുഹൃത്തുക്കൾക്ക് മൊബൈലിൽ സന്ദേശം അയച്ചിരുന്നതായാണ് വിവരം. സന്ദേശം കണ്ട് പരിഭ്രാന്തരായ സുഹൃത്തുക്കൾ ഉടൻ തന്നെ വീട്ടിൽ എത്തിയെങ്കിലും അഭിലിനെ തൂങ്ങിയ നിലയിൽ കണ്ടെത്തുകയായിരുന്നു. ഈ സമയം വീട്ടിൽ മറ്റാരും ഉണ്ടായിരുന്നില്ല.
ഉടൻ തന്നെ സുഹൃത്തുക്കൾ ചേർന്ന് അഭിലിനെ പത്തനാപുരത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. നിലവിൽ പത്തനാപുരത്തെ സ്വകാര്യ ആശുപത്രിയിലുള്ള മൃതദേഹം തുടർനടപടികൾക്കായി കോന്നി മെഡിക്കൽ കോളേജ് ആശുപത്രിയിലേക്ക് മാറ്റും. സംഭവത്തിൽ കൂടൽ പോലീസ് അന്വേഷണം ആരംഭിച്ചിട്ടുണ്ട്.
