ഏദൻ വിമാനത്താവളത്തിൽ ഹൂതി ആക്രമണം ; മിസൈൽ വീണത് യാത്രാവിമാനത്തിനടുത്ത്

ദുബായ്: യെമനിൽ സർക്കാരിന്റെ നിയന്ത്രണത്തിലുള്ള ഏദൻ രാജ്യാന്തര വിമാനത്താവളത്തിൽ ഹൂതികൾ നടത്തിയ ബാലിസ്റ്റിക് മിസൈൽ ആക്രമണത്തിൽനിന്നു യാത്രാവിമാനം തലനാരിഴയ്ക്കു രക്ഷപെട്ടു. ഈജിപ്ത് തലസ്ഥാനമായ കയ്റോയിലേക്കു പറക്കാനൊരുങ്ങിനിന്ന യെമനിയ എയർവേയ്സിന്റെ ഐവൈ 612 വിമാനത്തിൽനിന്ന് 500 മീറ്റർ അകലെയാണു മിസൈൽ പതിച്ചത്. പ്രധാന റൺവേയിൽനിന്നു 100 മീറ്റർ അകലെയാണിത്. യാത്രക്കാരും ജീവനക്കാരും സുരക്ഷിതരാണ്. ഹൂതികളുടെ ആക്രമണത്തിൽ സൗദി സഖ്യസേനയുടെ ആയുധപ്പുരയും തകർന്നു. ചെങ്കടലിൽ യെമൻ തീരത്ത് പ്രകൃതിവാതകവുമായി പോയ ടാങ്കറിനു നേരെ ബോട്ടിലെത്തിയ സംഘം വെടിയുതിർത്തു. ടാങ്കറിലെ സുരക്ഷാസേന തിരിച്ചു വെടിയുതിർത്തതോടെ അക്രമികൾ പിൻവാങ്ങി. ഇന്നലെ റിയാദ് ലക്ഷ്യമിട്ടെത്തിയ ഹൂതികളുടെ 4 ഡ്രോണുകൾ തകർത്തതായി സൗദി സഖ്യസേന അറിയിച്ചു. പ്രത്യാക്രമണത്തിൽ ഹൂതികളുടെ മിസൈൽ ലോഞ്ചറുകൾ തകർന്നു.

ഹോർമുസ് കടലിടുക്കിൽ ഇറാൻ സ്ഥാപിച്ച ബോംബുകൾ പൊട്ടി 2 എണ്ണക്കപ്പലുകൾക്ക് തീപിടിച്ചു. നിയന്ത്രണങ്ങൾ ലംഘിച്ചു മുന്നോട്ടു നീങ്ങിയ കപ്പലുകളാണ് അപകടത്തിലായതെന്ന് ഇറാൻ റവലൂഷനറി ഗാർഡ് അറിയിച്ചു.