കാലടി : ശ്രീ ശങ്കരാചാര്യ സംസ്കൃത സര്വ്വകലാശാലയുടെ കാലടി മുഖ്യക്യാമ്പസിലെ നാഷണല് സര്വ്വീസ് സ്കീം യൂണിറ്റിന്റെ ആഭിമുഖ്യത്തില് സര്വ്വകലാശാലയിലെ വിദ്യാര്ത്ഥികള് ചേര്ന്ന് ചിത്രീകരിച്ച ‘ഫ്ലാഷ് ബാക്ക്’ എന്ന ഹ്രസ്വചിത്രത്തിന്റെ ആദ്യ പ്രദര്ശനം നടന്നു. സര്വ്വകലാശാല യൂട്ടിലിറ്റി സെന്ററില് നടന്ന ചടങ്ങില് രജിസ്ട്രാര് ഡോ.എം.ബി ഗോപാലകൃഷ്ണന് ഹ്രസ്വചിത്രത്തിന്റെ പ്രദര്ശനോദ്ഘാടനം നിര്വ്വഹിച്ചു.
‘സ്ത്രീ ശാക്തീകരണം’ പ്രമേയമാക്കി നിര്മ്മിച്ച ‘ഫ്ലാഷ് ബാക്കി’ന്റെ സംവിധായകന് സജാദ് പെരുമ്പാവൂരാണ്. മനാഫ് മിയാമിയാണ് നിര്മ്മാതാവ്. ഇരുവരും നാഷണല് സര്വ്വീസ് സ്കീം വോളണ്ടിയര്മാരാണ്. നാഷണല് സര്വ്വീസ് സ്കീം പ്രോഗ്രാം ഓഫീസര് ഡോ.ജെന്സി.എം അധ്യക്ഷയായിരുന്നു. ഡയറക്ടര് ഓഫ് സ്റ്റുഡന്റ്സ് സര്വ്വീസസ് ഡോ.പി.ഉണ്ണികൃഷ്ണന്, നാഷണല് സര്വ്വീസ് സ്കീം പ്രോഗ്രാം കോഓര്ഡിനേറ്റര് ഡോ.സരിത ടി.പി, കാമ്പസ് യൂണിയന് വൈസ് ചെയര്പേഴ്സണ് ഹരിത രാഗ് എന്നിവര് പ്രസംഗിച്ചു.
