റാന്നി : ജൂണിൽ വിദ്യാലയങ്ങൾ തുറക്കുന്ന സാഹചര്യത്തിൽ കുട്ടികളെ വിദ്യാലയങ്ങളിലേക്ക് ആകർഷിക്കാൻ വന മേഖലകളിൽ വേറിട്ട പ്രവർത്തനങ്ങളുമായി റാന്നി ബിആർസി. ശബരിമല വാർഡിലെ വിവിധ ഊരുകളിലെ കുട്ടികൾക്കായാണ് പ്രവർത്തനങ്ങൾ നടത്തുന്നത്. പരിപാടിയുടെ ഉദ്ഘാടനം അട്ടത്തോട് ട്രൈബൽ ഗവൺമെന്റ് എൽപി സ്കൂളിനോട് അനുബന്ധിച്ച് നടക്കുന്ന ഊര് വിദ്യാ കേന്ദ്രത്തിൽ പെരുനാട് പഞ്ചായത്ത് പ്രസിഡന്റ് പി എസ് മോഹനൻ നിർവഹിച്ചു. പെരുനാട് വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ എം.എസ് ശ്യാം അധ്യക്ഷത വഹിച്ചു.
വികസനകാര്യ സ്റ്റാൻഡിങ് കമ്മിറ്റി ചെയർമാൻ സി എസ് സുകുമാരൻ,വാർഡ് മെമ്പർ മഞ്ജു പ്രമോദ്, ബി പി സി ഷാജി എ സലാം, സി ആർ സി കോ-ഓർഡിനേറ്റർമാരായ ദീപാ കെ പത്മനാഭൻ, ആര്യ എസ് രാജേന്ദ്രൻ, സോമൻ,ഭാസി, ഊര് വിദ്യാകേന്ദ്രം വിദ്യാഭ്യാസ വോളണ്ടിയർ ആശമോൾ എന്നിവർ പ്രസംഗിച്ചു. ശാസ്ത്ര രംഗം റാന്നി ഉപജില്ല കോ-ഓർഡിനേറ്റർ എഫ് അജിനി, സ്പെഷ്യലിസ്റ്റ് അധ്യാപിക(പ്രവൃത്തി പരിചയം )മിനിമോൾ എന്നിവർ ക്ലാസെടുത്തു. ശാസ്ത്രവും പ്രവർത്തി പരിചയവും കോർത്തിണക്കിയുള്ള പ്രവർത്തനങ്ങളാണ് കുട്ടികൾക്ക് നൽകിയത്. കേരള ശാസ്ത്ര സാഹിത്യ പരിഷത്ത് പെരുനാട് യൂണിറ്റ് ഊരിലെ കുട്ടികൾക്ക് ലൈബ്രറി പുസ്തകങ്ങൾ നൽകി.