വെച്ചൂച്ചിറ: വെച്ചൂച്ചിറ കൂത്താട്ടുകുളം മേഖലയിൽ തെരുവുനായ്ക്കളുടെ ശല്യം അതിരൂക്ഷമാകുന്നു. പകൽസമയത്തും രാത്രിയിലും ഒരുപോലെ ജനങ്ങൾക്ക് ഭീഷണിയുയർത്തി അഞ്ചും പത്തും നായ്ക്കളടങ്ങുന്ന സംഘങ്ങളാണ് പ്രദേശത്ത് തമ്പടിച്ചിരിക്കുന്നത്. കാൽനടയാത്രക്കാർക്കും ഇരുചക്ര വാഹനയാത്രക്കാർക്കുമാണ് ഇവ വലിയ തോതിൽ ബുദ്ധിമുട്ടുണ്ടാക്കുന്നത്. വാഹനങ്ങളുടെ പിന്നാലെ ഓടുന്നതും പെട്ടെന്ന് മുന്നിലേക്ക് ചാടിവീഴുന്നതും പതിവായതോടെ അപകടങ്ങളും വർദ്ധിച്ചിട്ടുണ്ട്.
മുമ്പ് ഈ മേഖലയിൽ പേപ്പട്ടിയുടെ സാന്നിധ്യം കണ്ടെത്തിയത് ജനങ്ങളിൽ കൂടുതൽ ആശങ്ക പരത്തിയിരിക്കുകയാണ്. തെരുവുനായ്ക്കൾക്ക് പുറമെ കുറുനരികളുടെ ശല്യവും വർദ്ധിച്ചതോടെ പ്രദേശവാസികൾ പുറത്തിറങ്ങാൻ പോലും ഭയപ്പെടുന്ന സാഹചര്യമാണ്. അധികൃതർ അടിയന്തിരമായി ഇടപെട്ട് ജനങ്ങളുടെ സുരക്ഷ ഉറപ്പാക്കണമെന്ന ആവശ്യം ശക്തമായിട്ടുണ്ട്
