ന്യൂഡല്ഹി : ആശ്രിത നിയമനം അവകാശമല്ലെന്ന് സുപ്രീംകോടതി. ഇത്തരം നിയമങ്ങള് കേവലം ആനുകൂല്യമാണെന്നും സുപ്രീംകോടതി. ഫെര്ടിലൈസേഴ്സ് ആന്റ് കെമിക്കല്സ് ട്രാവന്കൂര് (ഫാക്ടസ്) എന്ന സ്ഥാപനത്തില് ആശ്രിത നിയമനം നല്കണമെന്ന കേരളത്തില് നിന്നുള്ള യുവതിയുടെ ഹര്ജി തള്ളിക്കൊണ്ടാണ് സുപ്രീംകോടതിയുടെ ഉത്തരവ്. ജസ്റ്റിസുമാരായ എംആര് ഷാ, കൃഷ്ണ മുരാരി എന്നിവടങ്ങിയ ബെഞ്ചിന്റെതാണ് ഉത്തരവ്.
പിതാവ് സര്വീസിലിരിക്കെയാണ് മരിച്ചതെന്നും അതിനാല് ആശ്രിത നിയമനം ലഭിക്കണമെന്നാണ് യുവതിയുടെ ആവശ്യം. നിലവില് യുവതി അമ്മയോടൊപ്പമല്ല താമസിക്കുന്നതെന്ന് കൂടി മനസിലാക്കിയാണ് സുപ്രീംകോടതി അപ്പീല് തള്ളിയത്. 1995ലാണ് യുവതിയുടെ പിതാവ് മരണപ്പെടുന്നത്. ആശ്രിത നിയമനത്തിന് യുവതിയെ പരിഗണിക്കാന് കമ്പനിയോട് നിര്ദേശിച്ച ഹൈക്കോടതി ഉത്തരവിനെതിരെയാണ് ഫാക്ട് സുപ്രീംകോടതിയെ സമീപിച്ചത്.
ഒരു വ്യക്തി മരണപ്പെടുമ്പോള് അയാളെ ആശ്രയിച്ച് ജീവിക്കുന്നവര്ക്ക് പിന്നീട് ഉപജീവന മാര്ഗമില്ലാത്ത ഘട്ടത്തിലാണ് ആനുകൂല്യമെന്ന നിലയില് ആശ്രിത നിയമനം നല്കുന്നതെന്ന് സുപ്രീംകോടതി പറഞ്ഞു. എന്നാല് മരിച്ചവരുടെ ബന്ധുക്കള്ക്ക് ഇതിനെ ഒരു അവകാശമായി കണ്ട് നിയമനത്തിനായി വാദിക്കാനാകില്ലെന്നും സുപ്രീംകോടതി വ്യക്തമാക്കി.