റാന്നി : മന്ദമരുതി – വെച്ചൂച്ചിറ റോഡ് വീതി കൂട്ടി നിര്മ്മിച്ചപ്പോഴും ഇടമണ് ജംഗ്ഷനും ഓട്ടോ സ്റ്റാന്റിനും ഇടയിലുള്ള ചെറിയ കലുങ്ക് വീതി കൂട്ടിയില്ലെന്ന് ജനങ്ങളുടെ പരാതി. തീരെ വീതി കുറവായ ഈ ഭാഗത്ത് ചെറിയ വാഹനങ്ങള്ക്ക് പോലും കടന്നുപോകുവാന് കഴിയുന്നില്ല. കലുങ്ക് വീതികൂട്ടി നിര്മ്മിക്കണമെന്ന് ജനപ്രതിനിധികളോട് പ്രദേശത്തെ ജനങ്ങളും സ്ഥിരം യാത്രക്കാരും ആവശ്യപ്പെട്ടിരുന്നു. എന്നിട്ടും അധികൃതര് ആരും തന്നെ ഈ ആവശ്യം മുഖവിലക്കെടുത്തില്ല. ഇപ്പോള് മന്ദമരുതി വെച്ചൂച്ചിറ റോഡ് വീതികൂട്ടി നിര്മ്മിക്കുന്ന ജോലികള് അവസാന ഘട്ടത്തിലേക്ക് എത്തി. റോഡ് ടാറിംഗ് ആണ് ഇപ്പോള് നടക്കുന്നത്. എല് ആകൃതിയിലുള്ള വളവായതിനാല് ഈ ഭാഗത്ത് വാഹനം കടന്നുപോകാന് പ്രയാസം നേരിടുന്നുണ്ട്.
റാന്നി നിയോജക മണ്ഡലത്തിലെ പ്രധാന റോഡുകളില് ഒന്നില് സ്ഥിതി ചെയ്യുന്ന ഈ ചെറിയ കലുങ്കിന് മുകളില് കൂടി നിരവധി വാഹനങ്ങള് ഒരു ദിവസം കടന്നുപോകുന്നുണ്ട്. റോഡ് നിര്മ്മാണ പ്രവര്ത്തിയില് ഈ കലുങ്ക് കൂടി ഉള്പ്പെട്ടിരുന്നു എങ്കില് ഈ പ്രശ്നത്തിന് പൂര്ണ്ണമായി പരിഹാരം കാണാന് സാധിക്കുമായിരുന്നു. എന്നിട്ടും അധികാരികള് ഈ ആവശ്യത്തോട് മുഖം തിരിക്കുന്ന സമീപനമാണ് സ്വീകരിച്ചത്. മന്ദമരുതി – വെച്ചൂച്ചിറ റോഡ് നിര്മ്മാണം പൂര്ത്തിയാകുന്നതിന് മുന്പ് തന്നെ കലുങ്കിന് വീതി കൂട്ടി നിര്മ്മിക്കാന് അടിയന്തിര ഇടപെടല് നടത്തുവാന് റാന്നി എം.എല്.എ അടക്കമുള്ള ജനപ്രതിനിധികള് തയ്യാറാകണമെന്ന് പ്രവാസി കോൺഗ്രസ് മണ്ഡലം പ്രസിഡന്റ് റോയി ഉള്ളിരിക്കൽ ആവശ്യപ്പെട്ടു.
