ഐ.ടി.ഐ., പോളിടെക്നിക് സ്ഥാപനങ്ങളിൽ വിദ്യാഭ്യാസം നേടിയവര്‍ക്ക് വിദേശത്ത് തൊഴില്‍ നേടുവാന്‍ സര്‍ക്കാര്‍ പദ്ധതി ആവിഷ്കരിക്കും : അഡ്വ.പഴകുളം മധു എം.എല്‍.എ.

റാന്നി : ഐ.ടി.ഐ., പോളിടെക്നിക് സ്ഥാപനങ്ങളിൽ സാങ്കേതിക വിദ്യാഭ്യാസം നേടിയ യുവാക്കൾക്ക് വിദേശ രാജ്യങ്ങളിൽ തൊഴിൽ നേടാൻ സംസ്ഥാന സര്‍ക്കാര്‍ പ്രത്യേക പദ്ധതി ആവിഷ്കരിക്കണമെന്ന് അഡ്വ.പഴകുളം മധു എം.എൽ.എ. പറഞ്ഞു. റാന്നി ഗവൺമെന്റ് ഐ.ടി.ഐ. യിൽ 2026 ഓഗസ്റ്റ് ട്രേഡ് ടെസ്റ്റിൽ വിജയംനേടിയ പരിശീലനാർത്ഥികൾക്കുള്ള സർട്ടിഫിക്കറ്റ് വിതരണവും ട്രേഡ് തലത്തിൽ ഉയർന്ന മാർക്ക് നേടിയ പരിശീലനാർത്ഥികൾക്കുള്ള അവാർഡ് ദാനവും ഉദ്ഘാടനം ചെയ്യുകയായിരുന്നു അദ്ദേഹം. വിദ്യാർത്ഥികൾ നേടിയെടുത്ത സാങ്കേതിക വൈദഗ്ധ്യം തൊഴിൽ മേഖലയിലെ മികച്ച അവസരങ്ങളാക്കി മാറ്റണമെങ്കിൽ കുറഞ്ഞ വരുമാനമുള്ള കുടുംബങ്ങളിലെ കുട്ടികളെ സഹായിക്കാൻ സർക്കാർ തയ്യാറാവണം.

സാങ്കേതിക വൈദഗ്ധ്യമുള്ളവർക്ക് തൊഴിലവസരങ്ങൾ ലോകത്ത് ധാരാളമുള്ളപ്പോൾ കേരളത്തിലെ യുവാക്കൾ തൊഴിൽ തേടി അലയുകയാണെന്നും അദ്ദേഹം പറഞ്ഞു.
ഐ.ടി.ഐ. യിലെ ഡ്രാഫ്റ്റ്സ്മാൻ സിവിൽ, ഇലക്ട്രോണിക്സ് മെക്കാനിക് എന്നീ രണ്ട് ട്രേഡുകളിലായി പരിശീലനം പൂർത്തിയാക്കി ട്രേഡ് ടെസ്റ്റിൽ വിജയിച്ചവർക്കാണ് സർട്ടിഫിക്കറ്റുകൾ വിതരണം ചെയ്തത്. ഓരോ ട്രേഡിലും ഉയർന്ന മാർക്ക് നേടിയ പരിശീലനാർത്ഥികൾക്ക് അവാർഡുകളും നൽകി. റാന്നി ഗ്രാമപഞ്ചായത്ത് വൈസ് പ്രസിഡന്റ് ടി.ജെ.ബാബുരാജ്, വാർഡ് മെമ്പർ സാബു പി.എബ്രഹാം, പി.ടി.എ.പ്രസിഡന്റ് സജിത ബിനു, ജൂനിയർ ഇൻസ്ട്രക്ടർമാരായ സിദ്ധാർഥ് എ., റിയാസ് ടി.എം, റാന്നി ഗവ. ഐ.ടി.ഐ. പ്രിൻസിപ്പാള്‍ പി.പി.അനിൽ കുമാർ, ഷീല പി.സാബു എന്നിവർ പ്രസംഗിച്ചു.