ന്യൂഡൽഹി: സിവിൽ സർവീസസ് പ്രിലിമിനറി പരീക്ഷാ നടപടികളിൽ വിപ്ലവകരമായ മാറ്റവുമായി യൂണിയൻ പബ്ലിക് സർവീസ് കമ്മീഷൻ (യുപിഎസ്സി). പരീക്ഷയുടെ അന്തിമഫലം പ്രഖ്യാപിക്കുന്നതിന് മുൻപായി ഉത്തരസൂചിക പുറത്തിറക്കി. പരീക്ഷ എഴുതിയ ഉദ്യോഗാർത്ഥികൾക്ക് ഇപ്പോൾ കമ്മീഷന്റെ ഔദ്യോഗിക വെബ്സൈറ്റിൽ നിന്ന് ജനറൽ സ്റ്റഡീസ് പേപ്പർ 1, പേപ്പർ 2 എന്നിവയുടെ ഉത്തരസൂചികകൾ പിഡിഎഫ് (PDF) രൂപത്തിൽ പരിശോധിക്കാവുന്നതാണ്.
ഈ മാസം 24-ന് രാജ്യത്തെ 83 നഗരങ്ങളിലായി 2,072 കേന്ദ്രങ്ങളിലായാണ് പരീക്ഷ നടന്നത്. ആകെ രജിസ്റ്റർ ചെയ്തവരിൽ 67 ശതമാനം പേർ പരീക്ഷയിൽ പങ്കെടുത്തു. ഉത്തരസൂചികയിൽ എന്തെങ്കിലും പരാതികളോ ആക്ഷേപങ്ങളോ ഉള്ള ഉദ്യോഗാർത്ഥികൾക്ക് പ്രത്യേക പോർട്ടൽ വഴി അവ രേഖപ്പെടുത്താൻ അവസരമുണ്ട്. കൃത്യമായ തെളിവുകളും വിശദീകരണങ്ങളും സഹിതം വേണം ആക്ഷേപങ്ങൾ സമർപ്പിക്കാൻ. പരീക്ഷാ പ്രക്രിയയിലെ സുതാര്യത വർധിപ്പിക്കാൻ ഈ പുതിയ നടപടി സഹായിക്കും.
