കൊച്ചി : വാട്ടര് മെട്രോ സര്വീസ് ഒക്ടോബര് ആദ്യവാരം സര്വീസ് ആരംഭിക്കാനാകുമെന്നാണ് പ്രതീക്ഷയെന്ന് കൊച്ചി മെട്രോ റെയില് എംഡി ലോക്നാഥ് ബെഹ്റ പറഞ്ഞു. നാലു ബോട്ടുകള് ഇതുവരെ ലഭിച്ചിട്ടുണ്ട്. അഞ്ചാമത് ബോട്ടിന്റെ നിര്മാണം പുരോഗമിക്കുകയാണ്. ആദ്യഘട്ടത്തില് വൈപ്പിന്–ഹൈക്കോടതി പാതയിലാകും സര്വീസ് നടത്തുക. കൂടുതല് യാത്രക്കാരുള്ളതും രണ്ട് ദ്വീപുകളെ ബന്ധിപ്പിക്കുന്നതും കൊണ്ടാണ് ഇത് തെരഞ്ഞെടുത്തത്.
നിലവില് ഹൈക്കോടതി, ബോള്ഗാട്ടി, വൈപ്പിന് ജെട്ടികളുടെ നിര്മാണം പൂര്ത്തിയായി. ഫോര്ട്ട് കൊച്ചിയിലേത് അന്തിമഘട്ടത്തിലാണ്. മെട്രോ റെയിലിന്റെ പേട്ട–എസ്എന് ജങ്ഷന് പാതയുടെ ഉദ്ഘാടനത്തിന് കേന്ദ്രസര്ക്കാരിന്റെ അനുമതിക്കായി കാത്തിരിക്കുകയാണ്. മെട്രോ രണ്ടാംഘട്ടം കാക്കനാടുവരെയുള്ള ഭൂമിയേറ്റെടുക്കല്, റോഡ് വീതികൂട്ടല് ഉള്പ്പെടെയുള്ള നടപടികള് 75 ശതമാനത്തോളം പൂര്ത്തിയായി. കേന്ദ്രസര്ക്കാര് അനുമതി ലഭിച്ചശേഷമാകും നിര്മാണം ആരംഭിക്കുകയെന്നും ലോക്നാഥ് ബെഹ്റ പറഞ്ഞു.
