വയനാട് പനമരത്ത് ഗർഭിണിക്ക് മരുന്ന് മാറി നൽകിയതായി പരാതി

വയനാട് : വയനാട് പനമരത്ത് ഗർഭിണിക്ക് മരുന്ന് മാറി നൽകിയതായി പരാതി. പനമരം സാമൂഹികാരോഗ്യകേന്ദ്രത്തിൽ നിന്ന് നൽകിയ മരുന്നാണ് മാറിയത്. അയേണിനുള്ള ഇഞ്ചക്ഷന് പകരം പേവിഷബാധയ്ക്കുള്ള ഇഞ്ചക്ഷൻ മാറി നൽകിയതായാണ് ആരോപണം. പനമരം കീഞ്ഞുകടവ് വട്ടുകുത്ത് റാഹിന ആഷിഖിനാണ് (29) ഇഞ്ചക്ഷൻ മാറി നൽകിയത്. സംഭവത്തിൽ കൂടുതൽ വിവരങ്ങൾ പുറത്ത് വന്നിട്ടില്ല. രണ്ടു ദിവസം മുൻപ് കൊല്ലത്ത് സർക്കാർ ആശുപത്രിയിൽനിന്നു ഗർഭിണിക്ക് കാലാവധി കഴിഞ്ഞ ഫോളിക് ആസിഡ് ഗുളികകൾ നൽകിയതായി പരാതി ഉയർന്നിരുന്നു. മൂന്നുമാസം ഗർഭിണിയായ യുവതിക്ക്‌ ഛർദിയും വയർ വീക്കവും ഉണ്ടായി. പാലത്തറ സർക്കാർ ആശുപത്രിയുടെ ഭാഗമായ പള്ളിമുക്ക്‌ ആരോഗ്യകേന്ദ്രത്തിൽ നിന്നാണ് മരുന്ന് നൽകിയത്. അയത്തിൽ ഗാന്ധിനഗർ 225ൽ ആഷിന മൻസിലിൽ ബീമ ഹാരീഷിന്‌ ആണ്‌ ആരോഗ്യപ്രശ്‌നമുണ്ടായത്‌.

കഴിഞ്ഞ ജൂലൈയിൽ കാലാവധി അവസാനിച്ച ഗുളിക ഒക്ടോബർ മൂന്നിനാണ്‌ ബീമ താമസിക്കുന്ന മാടൻനടയിലെ വീട്ടിൽ ആശാ പ്രവർത്തക എത്തിച്ചത്‌. തുടർച്ചയായി ഗുളിക കഴിച്ചതോടെ ഛർദിയും വയർവേദനയും വയർവീക്കവും ഉണ്ടായി. ഇതേത്തുടർന്ന്‌ ബീമയെ കൊല്ലത്തെ സ്വകാര്യ ആശുപത്രിയിൽ പ്രവേശിപ്പിക്കുകയായിരുന്നു.