പേവിഷബാധയേറ്റുള്ള എട്ടുവയസുകാരി നിയ ഫൈസലിന്റെ മരണത്തില്‍ ചികിത്സ പിഴവില്ലെന്നു ക്രൈംബ്രാഞ്ച്

കൊല്ലം: പേവിഷബാധയേറ്റുള്ള എട്ടുവയസുകാരി നിയ ഫൈസലിന്റെ മരണത്തില്‍ ചികിത്സ പിഴവില്ലെന്നു ക്രൈംബ്രാഞ്ച്. പുനലൂര്‍ താലൂക്ക് ആശുപത്രിയില്‍ ഇമ്മ്യുണോഗ്ലോബുലിന്‍ ഡോസ് കൃത്യമായി നല്‍കിയെന്നാണ് പ്രാഥമിക അന്വേഷണ റിപ്പോര്‍ട്ട്. ഇമ്മ്യുണോഗ്ലോബുലിന്‍ ഇന്‍ജെക്റ്റ് ചെയ്തതില്‍ പിഴവ് ഉണ്ടായെന്നായിരുന്നു എന്നാണ് കുടുംബത്തിന്റെ പരാതി. റിപ്പോര്‍ട്ട് ക്രൈം ബ്രാഞ്ച് ഡെപ്യൂട്ടി സൂപ്രണ്ട് ക്രൈം ബ്രാഞ്ച് മേധാവിക്ക് കൈമാറി.2025 മെയ് മാസം തിരുവനന്തപുരം എസ്എടി ആശുപത്രിയില്‍ ചികിത്സയിലിരിക്കെയാണ് എട്ട് വയസുകാരി മരിക്കുന്നത്. ഏപ്രില്‍ എട്ടിനാണ് കുന്നിക്കോട് വിളക്കുടിയില്‍ വീടിന് സമീപത്ത് വെച്ച് നിയ ഫൈസലിനെ തെരുവുനായ കടിച്ചത്.

പുനലൂര്‍ താലൂക്ക് ആശുപത്രിയില്‍ എത്തിച്ച കുട്ടിക്ക് ഇമ്മ്യുണോഗ്ലോബുലിന്‍ വാക്‌സിന്‍ കൃത്യമായി നല്‍കിയില്ലെന്നും പരിചരണത്തില്‍ അലംഭാവം ഉണ്ടായെന്നുമായിരുന്നു കുടുംബത്തിന്റെ പരാതി. എന്നാല്‍ ചികിത്സ പിഴവുണ്ടായില്ലെന്നും വാക്സിന്‍ കൃത്യമായി നല്‍കിയെന്നുമാണ് അന്വേഷണ സംഘത്തിന്റെ കണ്ടെത്തല്‍. കുടുംബം ആഭ്യന്തര വകുപ്പ് മന്ത്രിക്ക് നല്‍കിയ പരാതിയുടെ അടിസ്ഥാനത്തില്‍ ക്രൈംബ്രാഞ്ച് നടത്തിയ അന്വേഷണത്തിന്റെ പ്രാഥമിക റിപ്പോര്‍ട്ടിലേതാണ് കണ്ടെത്തല്‍.കുട്ടിയുടെ ഭാരത്തിന് അനുസരിച്ചുള്ള മരുന്ന് നല്‍കി. മെഡിക്കല്‍ ബോര്‍ഡ് നിഗമനങ്ങള്‍ക്ക് ശേഷം മാത്രമെ ചികിത്സ പിഴവ് സംബന്ധിച്ച് അന്തിമതീരുമാനത്തില്‍ എത്താന്‍ കഴിയു എന്നും ക്രൈംബ്രാഞ്ച് വ്യക്തമാക്കുന്നു.