കേരളപ്പിറവി ദിനത്തില്‍ ഡോ.എം.എസ്.സുനിലിന്റെ 389 മത് സ്നേഹ ഭവനം ഏറ്റുവാങ്ങി രാധാമണിയും കുടുംബവും

പത്തനംതിട്ട : സാമൂഹിക പ്രവർത്തക ഡോ.എം.എസ്.സുനിൽ നിരാലംബര്‍ക്ക് നിര്‍മ്മിച്ചുനല്‍കുന്ന 389 മത് സ്നേഹ ഭവനം കേരളപ്പിറവി ദിനത്തില്‍ ളാഹ മഞ്ഞത്തോട് ആദിവാസി ഉന്നതിയിൽ രാധാമണിക്കും കുടുംബത്തിനും കൈമാറി. സക്കറിയ എബ്രഹാമിന്റെ സഹായത്തോടെയാണ് വീട് നിര്‍മ്മിച്ചു നല്‍കിയത്. വീടിന്റെ താക്കോൽ ദാനം പത്തനംതിട്ട ജില്ലാ കളക്ടർ എ.നിസാമുദ്ദീൻ നിർവഹിച്ചു. റോഡ്, ജലം, വൈദ്യുതി, തൊഴിൽ എന്നീ അടിസ്ഥാന വിഷയങ്ങളിൽ ജില്ലാ കളക്ടർ ഇടപെടുമെന്നും വിവിധ വകുപ്പുകളെ ഏകോപിപ്പിച്ചുകൊണ്ട് സമഗ്ര വികസന പ്രവർത്തനങ്ങൾക്ക് എല്ലാവിധ സഹായവും നല്‍കുമെന്നും അദ്ദേഹം ഉറപ്പുനല്‍കി. ളാഹ വനമേഖലയിലെ ഉള്‍വനത്തില്‍ ഇവർക്ക് ലഭിച്ച വസ്തുവിൽ യാതൊരുവിധ അടിസ്ഥാന സൗകര്യങ്ങളുമില്ലാതെ വർഷങ്ങളായി സുരക്ഷിതമല്ലാത്ത കുടിലിലായിരുന്നു ഇവര്‍ താമസിച്ചിരുന്നത്.

ഇവർക്കായി മൂന്ന് മുറികളും അടുക്കളയും ഹാളും ശുചിമുറിയും വരാന്തയും ബാൽക്കണികളും ഉള്‍പ്പെടുന്ന രണ്ടുനിലകളുള്ള വീടാണ് നിര്‍മ്മിച്ചുനല്‍കിയത്. പ്രകൃതി സൗഹൃദമായ രീതിയില്‍ വന്യമൃഗങ്ങളില്‍ നിന്നും സംരക്ഷണം ലഭിക്കുന്ന രീതിയിലാണ് വീടിന്റെ നിര്‍മ്മാണം. ഇതുപോലെയുള്ള 20 വീടുകളിൽ നാലാമത്തെ വീടാണ് കേരളപ്പിറവി ദിനത്തിൽ കൈമാറിയത്. ചടങ്ങിൽ റാന്നി ഫോറസ്റ്റ് റെയ്ഞ്ച് ഓഫീസർ ഷുഹൈബ്, ഡെപ്യൂട്ടി ഫോറസ്റ്റ് ഓഫീസർ ബെൻസി ലാൽ, പ്രോജക്ട് കോഡിനേറ്റർ കെ.പി.ജയലാൽ, സൂര്യ എന്നിവർ പ്രസംഗിച്ചു.