യുഎഇയിൽ ഇന്ന് ഇടിമിന്നലോടു കൂടിയ മഴയ്ക്ക് സാധ്യത

അബുദാബി : യുഎഇയുടെ വിവിധ ഭാഗങ്ങളിൽ ഇന്ന് ശക്തമായ മഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം (എൻസിഎം). ദുബായ്, അബുദാബി,വടക്കൻ എമിറേറ്റുകൾ എന്നിവിടങ്ങളിൽ ഇടിമിന്നലോടു കൂടിയ മഴ ലഭിച്ചേക്കും. ആകാശം ഭാഗികമായി മേഘാവൃതമായിരിക്കും. ദുബായിലും അബുദാബിയിലും താപനില 31 ഡിഗ്രി സെൽഷ്യസ് വരെ ഉയരും. തെക്കുകിഴക്കൻ ദിശയിൽനിന്നുള്ള കാറ്റ് പിന്നീട് വടക്കുപടിഞ്ഞാറൻ ദിശയിലേക്ക് മാറും. മണിക്കൂറിൽ 15 മുതൽ 30 കിലോമീറ്റർ വരെ വേഗത്തിൽ വീശുന്ന കാറ്റ് ചില സമയങ്ങളിൽ 60 കി.മീ വരെ ശക്തി പ്രാപിച്ചേക്കും.

അറബിക്കടലിൽ കടൽ പ്രക്ഷുബ്ധമാകുമെന്നും മുന്നറിയിപ്പുണ്ട്. ഒമാൻ കടൽ ഇന്നു ശാന്തമായിരിക്കുമെങ്കിലും നാളെ പുലർച്ചയോടെ പ്രക്ഷുബ്ധമായേക്കാം. അറബിക്കടലിൽ നിന്നുള്ള ഈർപ്പമുള്ള കാറ്റും ന്യൂനമർദത്തിന്റെ സ്വാധീനവുമാണ് യുഎഇയിൽ മഴയ്ക്ക് അനുകൂല സാഹചര്യമൊരുക്കുന്നത്.