ഭരണം മാറിയപ്പോള്‍ ആര്‍.എസ്.പിയിലൂടെ യു.ഡി.എഫില്‍ നുഴഞ്ഞുകയറി : പണപ്പിരിവ്, ജോലി വാഗ്ദാനം, സാമ്പത്തിക തട്ടിപ്പ് : മലയാലപ്പുഴ യു.ഡി.എഫില്‍ പ്രതിഷേധം ശക്തം

പത്തനംതിട്ട : മലയാലപ്പുഴ പഞ്ചായത്തില്‍ ഐക്യ ജനാധിപത്യ മുന്നണിയിൽ ഭിന്നിപ്പ് രൂക്ഷം. മലയാലപ്പുഴ പഞ്ചായത്തില്‍ പാര്‍ട്ടിയുടെ പേരുപറഞ്ഞ് പണപ്പിരിവ് നടത്തുകയും ജോലി വാഗ്ദാനം ചെയ്ത് സാമ്പത്തിക തട്ടിപ്പ് നടത്തിയെന്നുമാരോപിച്ച് ഘടക കക്ഷിയായ ആര്‍.എസ്.പി. യില്‍ നേതാക്കളും പ്രവര്‍ത്തകരും തമ്മിലുള്ള തര്‍ക്കമാണ് തമ്മിലടിയില്‍ കലാശിച്ചത്. ഇതിനെതിരെ ആര്‍.എസ്.പി. മലയാലപ്പുഴ ലോക്കല്‍ കമ്മറ്റി സെക്രട്ടറി കഴിഞ്ഞ ദിവസം സമൂഹ മാധ്യമങ്ങളിലൂടെ നടത്തിയ പ്രതികരണമാണ് തട്ടിപ്പിന്റെ  ചിത്രം വ്യക്തമാക്കിയത്. തട്ടിപ്പ് നടത്തിയ ആള്‍ മുന്‍പ് ബി.ജെ.പി. യിലും എന്‍.സി.പി. യിലും പ്രവര്‍ത്തിച്ചിരുന്ന കാലത്ത് നടത്തിയ പണപ്പിരിവുകളുടെയും തട്ടിപ്പുകളുടെയും അടിസ്ഥാനത്തിലാണ് ഇയാളെ പാര്‍ട്ടിയില്‍ നിന്നും പുറത്താക്കിയത്.

എന്നാല്‍ ഭരണം മാറിയപ്പോള്‍ ഭാര്യയുടെ ജോലി നിലനിര്‍ത്തുവാന്‍ വേണ്ടി ആര്‍.എസ്.പി. യില്‍ ഇയാള്‍ അംഗത്വമെടുക്കുകയായിരുന്നുവെന്നും ആര്‍.എസ്.പി. സംസ്ഥാന കമ്മറ്റി അംഗമാണ് ഇയാളെ സംരക്ഷിക്കുന്നതെന്നുമാണ് പ്രധാന ആരോപണം. ഇത്തരം തട്ടിപ്പുകാരെ ആര്‍.എസ്.പി. സംരക്ഷിക്കുന്നത് മൂലം  യു.ഡി.എഫിന്റെ  പ്രതിച്ഛായ തകരുവാൻ കാരണമാകുമെന്നും പ്രവര്‍ത്തകര്‍ പറയുന്നു. ഭരണം മാറുമ്പോള്‍ കാര്യ സാധ്യത്തിനുവേണ്ടി പാര്‍ട്ടിയിലേക്ക് കടന്നുവരുന്ന ഇത്തരക്കാരെ പാര്‍ട്ടിയില്‍ നിന്നും ഒഴിവാക്കണമെന്നും കോണ്‍ഗ്രസിലെ ഒരു വിഭാഗം നേതാക്കള്‍ ആവശ്യപ്പെട്ടു.