കാമുകനുമായി വിഡിയോ കോൾ ; പിന്നാലെ യുവതി തൂങ്ങി മരിച്ച നിലയിൽ

ഹൈദരാബാദ്: കാമുകനുമായി വിഡിയോ കോളിൽ ദീർഘനേരം സംസാരിച്ചതിനു പിന്നാലെ യുവതി ജീവനൊടുക്കി. ഹൈദരാബാദില്‍ ഇന്നലെ രാവിലെയാണ് സംഭവം. ഉത്തർപ്രദേശ് സ്വദേശിനിയും ഹൈദരാബാദിൽ സോഫ്റ്റ്‍വെയർ എൻജിനീയറുമായ അർച്ചന ചൗധരി(29)യെയാണ്, അവർ താമസിക്കുന്ന ഫ്ലാറ്റിൽ തൂങ്ങി മരിച്ച നിലയിൽ കണ്ടെത്തിയത്. ഉത്തരാഖണ്ഡ് സ്വദേശിയും സഹപ്രവർത്തകനുമായ യുവാവുമായി നാലു വര്‍ഷമായി അർച്ചന പ്രണയത്തിലായിരുന്നുവെന്ന് പോലീസ് പറയുന്നു. പുലര്‍ച്ചെ അര്‍ച്ചന യുവാവിനെ വിഡിയോ കോള്‍ ചെയ്തുവെന്നും പിന്നാലെയാണ് മരണം സംഭവിച്ചതെന്നും പോലീസ് അറിയിച്ചു. പുലർച്ചെ അഞ്ചരയോടെ യുവാവ് അർച്ചനയുടെ ഫ്ലാറ്റിലെത്തുകയും വാതിൽ തുറക്കാൻ കഴിയാതെ വന്നതോടെ പോലീസിൽ വിവരം അറിയിക്കുകയുമായിരുന്നു.

പോലീസ് എത്തി വാതിൽ ചവിട്ടി തുറന്ന് അകത്തു കയറിയപ്പോഴാണ് ഫാനിൽ തൂങ്ങിനിൽക്കുന്ന അർച്ചനയെ കണ്ടത്. തുടർന്ന് മൃതദേഹം ആശുപത്രിയിലേക്കു മാറ്റി. സംഭവത്തിൽ കേസ് രജിസ്റ്റർ ചെയ്ത് അന്വേഷണം ആരംഭിച്ചതായി പോലീസ് അറിയിച്ചു.