ആഗോള ദൈവദശകം പാരായണം 25 ന് : അടൂർ യൂണിയനിലെ 65 ശാഖകളും പങ്കുചേരും

അടൂര്‍ : ജർമ്മനി ആസ്ഥാനമായി പ്രവർത്തിക്കുന്ന ശ്രീനാരായണ ഫോറം ഫോർ യൂണിവേഴ്സൽ ബ്രദർഹുഡിന്‍റെ നേതൃത്വത്തിൽ വിവിധ രാജ്യങ്ങളിലായി പത്തുലക്ഷം പേർ ഒരേസമയം ദൈവദശകം പാരായണം ചെയ്യുന്ന ‘ഒരു ലോകം ഒരു പ്രാർത്ഥന’ പരിപാടി ഒക്ടോബർ 25 ഞായറാഴ്ച വൈകിട്ട് 7.15-ന് നടക്കും. ലോക സാഹോദര്യത്തിന്‍റെയും മാനവികതയുടെയും സന്ദേശമുയർത്തി നടത്തുന്ന ആഗോള ദൈവദശകം പാരായണത്തിൽ എസ്.എൻ.ഡി.പി. യോഗം അടൂർ യൂണിയനിലെ 65 ശാഖകളും പങ്കുചേരും. എസ്.എൻ.ഡി.പി. യോഗത്തിന്‍റെ നിർദേശപ്രകാരം അടൂർ യൂണിയനുകീഴിലുള്ള 65 ശാഖകളിലും ഒരേസമയം ദൈവദശകം പാരായണം ചെയ്യും.

ശ്രീനാരായണ ഗുരുദേവന്‍റെ ദർശനങ്ങളും മാനവികതയുടെയും സാഹോദര്യത്തിന്‍റെയും സന്ദേശവും ലോകമെമ്പാടും പ്രചരിപ്പിക്കുക എന്ന ലക്ഷ്യത്തോടെയാണ് പരിപാടി നടത്തുന്നത്. പരിപാടിയിൽ മുഴുവൻ ശാഖകളും സജീവമായി പങ്കെടുക്കണമെന്ന് എസ്.എൻ.ഡി.പി. യോഗം അടൂർ യൂണിയൻ ചെയർമാൻ അഡ്വ.എം.മനോജ് കുമാര്‍, കൺവീനർ അഡ്വ.മണ്ണടി മോഹനന്‍ എന്നിവര്‍ അറിയിച്ചു.