പത്തനംതിട്ട ജില്ലാ പോലീസിന് 24 സീറ്റുകളുള്ള എ.സി.ബസ് ഉള്‍പ്പെടെ പുതിയ ആറുവാഹനങ്ങള്‍ : ജില്ലാ പോലീസ് മേധാവി ഫ്ലാഗ് ഓഫ് ചെയ്തു

പത്തനംതിട്ട : കേരള പോലീസ് സേനയുടെ പ്രവർത്തന ക്ഷമതയും അടിസ്ഥാന സൗകര്യങ്ങളും മെച്ചപ്പെടുത്തുന്നതിന്റെ  ഭാഗമായി 164 പുതിയ വാഹനങ്ങൾ അനുവദിച്ചതിലൂടെ ജില്ലയ്ക്ക് ലഭിച്ച ആറുവാഹനങ്ങള്‍ ജില്ല പോലീസ് മേധാവി ആര്‍.ആനന്ദ് ഫ്ലാഗ് ഓഫ് ചെയ്തു. 24 സീറ്റുകളുള്ള എ.സി.ബസ് ഉള്‍പ്പെടെയാണ് ഫ്ലാഗ് ഓഫ് ചെയ്തത്. വിവിധ സ്ഥലങ്ങളിലേക്ക് ഡ്യൂട്ടിക്കായി പോകുന്ന പോലീസ് ഉദ്യോഗസ്ഥർക്ക് സുഖപ്രദമായി യാത്ര ചെയ്യുന്നതിനുള്ള സൗകര്യം ലഭ്യമാക്കുകയെന്ന ലക്ഷ്യത്തോടെയാണ് എ.സി.ബസ് നല്‍കിയത്. കാലപ്പഴക്കമുള്ള പോലീസ് വാഹനങ്ങള്‍ നീക്കം ചെയ്യുന്നതിനും ഇതിലൂടെ ലക്ഷ്യമിടുന്നു.

ക്രമസമാധാനപാലനം, സ്ത്രീകളുടെയും കുട്ടികളുടെയും സുരക്ഷയ്ക്കായുള്ള പ്രവർത്തനങ്ങൾ, ലഹരി വിരുദ്ധ പ്രവർത്തനങ്ങൾ, തീവ്രവാദ വിരുദ്ധ നടപടികൾ മുതലായ പോലീസിന്റെ  സുപ്രധാന ചുമതലകൾ കൂടുതൽ ശക്തിപ്പെടുത്തുന്നതിനും പോലീസ് സേനയുടെ ദൈനംദിന പ്രവർത്തനങ്ങൾ കാര്യക്ഷമമാക്കുന്നതിനും പുതിയ വാഹനങ്ങൾ സഹായകമാകുമെന്നും ജില്ലാ പോലീസ് മേധാവി പറഞ്ഞു. അഡീഷണൽ ജില്ലാ പോലീസ് സൂപ്രണ്ട് ആർ.ജയരാജ്, കോന്നി എ.എസ്.പി. നിമിഷി ത്രിപാഠി, ഡിസ്ട്രിക്ട് ഹെഡ് ക്വാര്‍ട്ടേഴ്സ് അസിസ്റ്റന്റ് കമാണ്ടന്റ് സന്തോഷ് കുമാർ പി.പി., റിസർവ് ഇൻസ്പെക്ടർ ബിജുലാൽ, എം.ടി.ഓ. പ്രദീപ്‌ കുമാർ എന്നിവര്‍ ചടങ്ങില്‍ പങ്കെടുത്തു.