ചെങ്ങറയില്‍ കാട്ടാന ആക്രമണം : വ്യാപകമായി കൃഷി നശിപ്പിച്ചു

കോന്നി : കോന്നി പഞ്ചായത്തിലെ അഞ്ചാം വാര്‍ഡായ ചെങ്ങറ ചെമ്മാനിയില്‍ കാട്ടാനയുടെ ആക്രമണത്തില്‍ വ്യാപകമായി കൃഷി നശിച്ചു. ചെമ്മാനി മണ്ണില്‍ വീട്ടില്‍ മനോജ് വര്‍ഗീസിന്‍റെ കൃഷിയിടത്തിലെ തെങ്ങ്, വാഴ, ചേമ്പ്, ചേന, വേലികള്‍ തുടങ്ങിയവയാണ് നശിപ്പിച്ചത്. കഴിഞ്ഞ രാത്രിയിലാണ് കാട്ടാനകള്‍ ജനവാസ മേഖലയിലിറങ്ങി നാശം വിതച്ചത്. പ്രദേശത്തെ വനാതിര്‍ത്തിയില്‍ സോളാര്‍ വേലികള്‍ സ്ഥാപിക്കാത്തതാണ് കാട്ടാനകള്‍ ജനവാസ മേഖലയിലേക്ക് എത്തുന്നതിന് പ്രധാന കാരണമെന്നാണ് നാട്ടുകാര്‍ പറയുന്നത്. മാത്രമല്ല പ്രദേശത്തെ സ്വകാര്യ വ്യക്തികളുടെ ഭൂമികള്‍ വര്‍ഷങ്ങളായി കാടുകയറി കിടക്കുന്നതും പ്രദേശത്ത് വന്യജീവികളുടെ ശല്യം വര്‍ധിക്കുന്നതിന് കാരണമാകുന്നതായി നാട്ടുകാര്‍ പറയുന്നു.

ഈ കാടുകള്‍ തെളിക്കുവാന്‍ കോന്നി ഗ്രാമപഞ്ചായത്ത് അധികൃതര്‍ സ്വകാര്യ വ്യക്തികളോട് ആവശ്യപ്പെടുന്നില്ലെന്നും ജനങ്ങള്‍ക്ക് പരാതിയുണ്ട്. നിരവധി തവണ ഈ വിഷയം നാട്ടുകാര്‍ കോന്നി ഗ്രാമപഞ്ചായത്ത് അധികൃതരോട് ആവശ്യപ്പെടുകയും ചെയ്തിരുന്നു. മാത്രമല്ല രാത്രിയില്‍ കാട്ടാനകള്‍ ജനവാസ മേഖലയിലെത്തുന്നത് വനപാലകരെ അറിയിച്ചാലും ഇവര്‍ സ്ഥലത്തെത്തുവാന്‍ തയാറാകുന്നില്ലെന്നും പരാതിയുണ്ട്. കഴിഞ്ഞ കുറച്ചുദിവസമായി കാട്ടാനകള്‍ സ്ഥിരമായി ഈ പ്രദേശത്തെ ജനവാസ മേഖലയില്‍ എത്തുന്നതായാണ് നാട്ടുകാര്‍ പറയുന്നത്. ചെങ്ങറ ഹാരിസണ്‍ എസ്റ്റേറ്റ് ഭാഗത്ത് നിന്നാണ് കാട്ടാനകള്‍ ജനവാസ മേഖലയില്‍ പ്രവേശിക്കുന്നതെന്നും ജനങ്ങള്‍ പറയുന്നു.