ഇറക്കുമതി നികുതി കുറയ്ക്കാനും ഇന്ത്യൻ വിരുദ്ധ വിദ്വേഷം തടയാനും ഇടപെടും ; നിലപാട് വ്യക്തമാക്കി അമിഷ് ഷാ

വാഷിംഗ്ടൺ: അമേരിക്കയിലെ നിയുക്ത കോൺഗ്രസ് അംഗം അമിഷ് ഷാ ഇറക്കുമതി നികുതികൾ പിൻവലിക്കണമെന്നും നികുതി നിശ്ചയിക്കാനുള്ള അധികാരം വൈറ്റ് ഹൗസിൽ നിന്ന് മാറ്റണമെന്നും ആവശ്യപ്പെട്ടു. ഉയർന്ന നികുതികൾ ഇന്ത്യൻ വംശജരായ വ്യാപാരികളെയും ചെറുകിട ബിസിനസ്സുകളെയും സാരമായി ബാധിക്കുന്നുണ്ടെന്ന് അദ്ദേഹം ചൂണ്ടിക്കാട്ടി. നികുതി തർക്കങ്ങൾ പരിഹരിക്കുന്നത് ഇന്ത്യയും അമേരിക്കയും തമ്മിലുള്ള ബന്ധം കൂടുതൽ മെച്ചപ്പെടുത്താൻ സഹായിക്കുമെന്നും അമിഷ് ഷാ വ്യക്തമാക്കി. രാജ്യത്ത് വർദ്ധിച്ചുവരുന്ന ഇന്ത്യൻ വിരുദ്ധ വിദ്വേഷത്തിനെതിരെ ശക്തമായി പോരാടുമെന്നും അദ്ദേഹം ഉറപ്പുനൽകി. കഴിഞ്ഞ ആറ് മാസത്തിനിടെ ഇന്ത്യൻ സമൂഹത്തിന് നേരെയുണ്ടായ വിദ്വേഷ പരാമർശങ്ങൾ വലിയ ആശങ്കയുണ്ടാക്കുന്നതാണെന്ന് അദ്ദേഹം പറഞ്ഞു. ജനപ്രതിനിധികൾ ഇത്തരം പ്രവണതകളെ അപലപിക്കണമെന്നും ആരാധനാലയങ്ങളിൽ ഉൾപ്പെടെ എല്ലാവർക്കും സുരക്ഷിതത്വം ഉറപ്പാക്കണമെന്നും അദ്ദേഹം ആവശ്യപ്പെട്ടു.

നിത്യോപയോഗ സാധനങ്ങളുടെ വിലക്കയറ്റം കുറയ്ക്കുക, ആരോഗ്യ മേഖല മെച്ചപ്പെടുത്തുക എന്നിവയ്ക്കായിരിക്കും തന്റെ പ്രഥമ പരിഗണനയെന്ന് അമിഷ് ഷാ പറഞ്ഞു. ഗുജറാത്ത് വേരുകളുള്ള അമിഷ് ഷായുടെ മുത്തച്ഛൻ കൊച്ചിയിൽ തേയില, സുഗന്ധവ്യഞ്ജന വ്യാപാരം നടത്തിയിരുന്ന വ്യക്തിയാണ്. ജനങ്ങളുടെ ജീവിതച്ചെലവ് കുറയ്ക്കുന്നതിനായി ഇരു പാർട്ടികളുമായും യോജിച്ച് പ്രവർത്തിക്കുമെന്നും അദ്ദേഹം പറഞ്ഞു.