ജോലി ചെയ്യാത്തവർ ഭക്ഷണം കഴിക്കരുത് ; നാല്പത്തിരണ്ടുകാരിയുടെ ചുണ്ടുകൾ സൂചിയും നൂലും ഉപയോഗിച്ച് തുന്നിച്ചേർത്ത കേസിൽ പ്രതി കുറ്റം സമ്മതിച്ചു

ടോക്യോ:  നാല്പത്തിരണ്ടുകാരിയായ റൂംമേറ്റിന്റെ ചുണ്ടുകൾ സൂചിയും നൂലും ഉപയോഗിച്ച് തുന്നിച്ചേർക്കാൻ നിർബന്ധിച്ച അൻപതുകാരിയായ സ്ത്രീ കോടതിയിൽ കുറ്റം സമ്മതിച്ചു. ഇബരാക്കി പ്രവിശ്യയിലെ കോടതിയിൽ നടന്ന വിചാരണയുടെ ആദ്യ ദിവസം തന്നെ മാസേ സകുരായ് എന്ന പ്രതി കുറ്റം സമ്മതിക്കുകയായിരുന്നു. നേരത്തെ പോലീസ് പിടിയിലായ സമയത്ത് ഇവർക്കെതിരെയുള്ള ആരോപണങ്ങൾ പൂർണ്ണമായും നിഷേധിച്ചിരുന്നു. ജൂൺ പതിനെട്ടിനും ഇരുപത്തിനാലിനും ഇടയിലാണ് ക്രൂരമായ ഈ സംഭവം നടന്നിരിക്കുന്നത്. ജോലി ചെയ്യാത്തവർ ഭക്ഷണം കഴിക്കാൻ പാടില്ലെന്ന വിചിത്ര വാശിയിലായിരുന്നു പ്രതിയായ മാസേ സകുരായ്. അനുമതിയില്ലാതെ വീട്ടിലെ ഭക്ഷണം എടുത്തു കഴിച്ചതിനാണ് യുവതിക്കെതിരെ ഇത്തരത്തിലുള്ള ക്രൂരത ഇവർ കാട്ടിയത്. താൻ തന്നെ ചെയ്താൽ വേദന ഇരട്ടിയാകുമെന്ന് ഭീഷണിപ്പെടുത്തിയാണ് സ്വന്തം ചുണ്ടുകൾ തുന്നാൻ പ്രതി നിർബന്ധിച്ചത്. പ്രോസിക്യൂഷൻ സമർപ്പിച്ച കുറ്റപത്രത്തിലെ വിവരങ്ങൾ കോടതിയിൽ വ്യക്തമാക്കിയതോടെയാണ് ഈ ഞെട്ടിക്കുന്ന വിവരം പുറത്തുവന്നത്. സംഭവത്തിൽ കോടതിയുടെ തുടർന്നുള്ള നടപടികൾ അതിവേഗം പുരോഗമിച്ചുവരികയാണ്.