ബംഗ്ലാദേശിൽ അഞ്ചാംപനി പടരുന്നു ; 24 മണിക്കൂറിനിടെ ഏഴ് കുട്ടികൾ കൂടി മരിച്ചു

ധാക്ക : ബംഗ്ലാദേശിൽ അഞ്ചാംപനി വ്യാപനം ഗുരുതരമായ ആരോഗ്യപ്രതിസന്ധിയായി തുടരുന്നു. രോഗലക്ഷണങ്ങളോടെ 24 മണിക്കൂറിനിടെ ഏഴ് കുട്ടികൾ കൂടി മരിച്ചതോടെ നിലവിലെ വ്യാപനവുമായി ബന്ധപ്പെട്ട ആകെ മരണസംഖ്യ 1,196 ആയി ഉയർന്നു. ഡയറക്ടറേറ്റ് ജനറൽ ഓഫ് ഹെൽത്ത് സർവീസസിന്റെ (ഡി.ജി.എച്ച്.എസ്) കണക്കുകൾ ഉദ്ധരിച്ച് ധാക്ക ട്രിബ്യൂണാണ് ഇക്കാര്യം റിപ്പോർട്ട് ചെയ്തത്. രോഗവ്യാപനം നിയന്ത്രിക്കാൻ വാക്സിനേഷൻ നടപടികൾ ശക്തമാക്കിയിട്ടുണ്ടെങ്കിലും പ്രതിസന്ധി ഉടൻ അവസാനിക്കാനുള്ള സാധ്യത കുറവാണെന്നാണ് ആരോഗ്യവിദഗ്ധരുടെ മുന്നറിയിപ്പ്.

ആരോഗ്യവകുപ്പിന്റെ കണക്കുകൾ പ്രകാരം മരണങ്ങളിൽ ഭൂരിഭാഗവും അഞ്ചാംപനി സംശയിക്കുന്ന വിഭാഗത്തിലാണ് ഉൾപ്പെടുത്തിയിരിക്കുന്നത്. ഇതോടെ രോഗം സംശയിച്ച് റിപ്പോർട്ട് ചെയ്ത മരണങ്ങളുടെ എണ്ണം 1,092 ആയി. അഞ്ചാംപനി സ്ഥിരീകരിച്ച മരണങ്ങൾ 104 ആണ്. സംശയിക്കുന്ന മരണങ്ങളും സ്ഥിരീകരിച്ച മരണങ്ങളും ഉൾപ്പെടുന്നതാണ് ആകെ കണക്ക്.