വടശ്ശേരിക്കരയിലെ വന്യമൃഗ ശല്യം നിയന്ത്രിക്കുവാന്‍ സ്ഥാപിച്ച എ.ഐ. അലാറം ഫലപ്രദമെന്ന് വനം വകുപ്പ്

വടശ്ശേരിക്കര : വടശ്ശേരിക്കരയില്‍ വന്യമൃഗ ശല്യം നിയന്ത്രിക്കുവാന്‍ ലക്ഷങ്ങള്‍ മുടക്കി വനം വകുപ്പ് സ്ഥാപിച്ച എ.ഐ. ക്യാമറ അലാറം സംവിധാനം കാട്ടാനകളെ തുരത്തുവാന്‍ സഹായിക്കുന്നുണ്ടെന്ന് വനം വകുപ്പ്. ജനവാസ മേഖലയില്‍ എത്തിയ കാട്ടാനകള്‍ ഈ സംവിധാനത്തില്‍ നിന്നുള്ള ശബ്ദം കേട്ട് വനത്തിലേക്ക് ഓടുന്ന ദൃശ്യങ്ങള്‍ വനപാലകര്‍ പുറത്തുവിട്ടു. ഈ സംവിധാനങ്ങള്‍ പൂര്‍ണ്ണമായി പരാജയപ്പെട്ടുവെന്നും വടശ്ശേരിക്കരയുടെ വിവിധ പ്രദേശങ്ങളായ ഒളികല്ല്, താമരപ്പള്ളി തോട്ടം, ബൗണ്ടറി, കുമ്പളത്താമൺ റോഡ് എന്നിവടങ്ങളില്‍ കാട്ടാന ശല്യം രൂക്ഷമാണെന്നും ജനങ്ങള്‍ പറയുന്നു. പ്രദേശത്തെ നിരവധി കാര്‍ഷിക വിളകളും കാട്ടാനകള്‍ ഇതിനോടകം നശിപ്പിച്ചിട്ടുണ്ട്.

പ്രതിരോധ സംവിധാനങ്ങള്‍ നോക്കുകുത്തിയായതോടെ കാട്ടാന ഉള്‍പ്പെടെയുള്ള വന്യജീവികള്‍ നാട്ടിലിറങ്ങുന്നതുകാരണം ജനങ്ങളുടെ ജീവനും സ്വത്തിനും വലിയ സുരക്ഷാ ഭീഷണി നേരിടുന്നുവെന്നും ജനങ്ങള്‍ ആരോപിക്കുന്നു. ആനകള്‍ നാട്ടിലറങ്ങുന്ന ദൃശ്യങ്ങള്‍ സഹിതം സമൂഹ മാധ്യമങ്ങളിലുള്‍പ്പെടെ ജനങ്ങള്‍ പ്രചരിപ്പിക്കുന്നുണ്ട്. വടശ്ശേരിക്കര ടൗണിനുസമീപത്തും കാട്ടാനകള്‍ നിരന്തരമായി എത്തുന്നുണ്ട്. നദി കടന്നാണ് ആനകള്‍ ജനവാസ മേഖലയിലേക്ക് എത്തുന്നതെന്നും ജനങ്ങള്‍ പറയുന്നു. എ.ഐ. ക്യാമറ അലാറം സംവിധാനം ആനകളെ ഓടിക്കുവാന്‍ ഫലപ്രദമാണെന്ന് തെളിഞ്ഞതിനാല്‍ ഇത് കൂടുതല്‍ സ്ഥലങ്ങളിലേക്ക് വ്യാപിപ്പിക്കുമെന്ന് റാന്നി എം.എല്‍.എ. അഡ്വ.പഴകുളം മധു പറഞ്ഞു.