എച്ച്.ഡി.എഫ്.സി ബാങ്കിൽ വിവരച്ചോർച്ച ; രണ്ട് മുതിർന്ന ഉദ്യോഗസ്ഥർക്കെതിരെ ആഭ്യന്തര അന്വേഷണം

മുംബൈ : ഇന്ത്യയിലെ ഏറ്റവും വലിയ സ്വകാര്യ ബാങ്കായ എച്ച്.ഡി.എഫ്.സി ബാങ്കിന്റെ രഹസ്യ വിവരങ്ങൾ രണ്ട് മുതിർന്ന ഉദ്യോഗസ്ഥർ ചോർത്തിയതായി ആഭ്യന്തര അന്വേഷണത്തിൽ കണ്ടെത്തിയെന്ന് റിപ്പോർട്ട്. ബാങ്കിന്റെ രഹസ്യ ബിസിനസ് തന്ത്രങ്ങളും പ്രവർത്തനങ്ങളെ ബാധിക്കാൻ സാധ്യതയുള്ള വിവരങ്ങളുമാണ് പുറത്തായതെന്നാണ് വിവരം. ചോർന്ന വിവരങ്ങൾ ദുരുപയോഗം ചെയ്തിട്ടുണ്ടോ എന്നറിയാനുള്ള പരിശോധനകൾ തുടരുകയാണ്. ബാങ്കിലെ ചില ഉദ്യോഗസ്ഥർ സംശയം ഉന്നയിച്ചതിനെത്തുടർന്നാണ് ആഭ്യന്തര അന്വേഷണം ആരംഭിച്ചത്. വിവരച്ചോർച്ചയുടെ വ്യാപ്തി മനസ്സിലാക്കുന്നതിനായി വിശദമായ അവലോകനം നടത്തിവരികയാണെന്ന് എച്ച്.ഡി.എഫ്.സി ബാങ്ക് വക്താവ് അറിയിച്ചു. അന്വേഷണം പൂർത്തിയായശേഷം ബന്ധപ്പെട്ട ഉദ്യോഗസ്ഥർക്കെതിരെ ആവശ്യമായ നടപടി സ്വീകരിക്കുമെന്നും ബാങ്ക് വ്യക്തമാക്കി.

അതേസമയം ബാങ്കിന്റെ തലപ്പത്തെ നിർണായക മാറ്റത്തിന് മുന്നോടിയായാണ് വിവരച്ചോർച്ച സംബന്ധിച്ച റിപ്പോർട്ട് പുറത്തുവരുന്നത്. ഒക്ടോബർ 27ന് ഐ.സി.ഐ.സി.ഐ ഗ്രൂപ്പിൽ നിന്നുള്ള അനൂപ് ബഗ്ചി എച്ച്.ഡി.എഫ്.സി ബാങ്കിന്റെ പുതിയ ചീഫ് എക്സിക്യൂട്ടീവായി ചുമതലയേൽക്കാനിരിക്കുകയാണ്. നിലവിലെ സി.ഇ.ഒ ശശിധർ ജഗദീശൻ സ്ഥാനമൊഴിയുന്നതിനെ തുടർന്നാണ് ഈ മാറ്റം.