പത്തനംതിട്ട സ്വദേശി മെൽവിൻ ഡാനിയൽ റോജിക്ക് ജർമ്മനിയിൽ ഗവേഷണ ഡോക്ടറേറ്റും പരമോന്നത അക്കാദമിക ബഹുമതിയും

പത്തനംതിട്ട : കുമ്പഴ പായിക്കാട്ട് കുടുംബാംഗമായ മെൽവിൻ ഡാനിയൽ റോജി ജർമ്മനിയിലെ ഹാനോവർ വെറ്ററിനറി മെഡിസിൻ സർവകലാശാലയിൽനിന്ന് ഗവേഷണ ഡോക്ടറേറ്റ് നേടി. ഗവേഷണ മികവിനുള്ള സർവകലാശാലയുടെ പരമോന്നത അക്കാദമിക ബഹുമതിയായ ‘സുമ്മ കം ലൗഡെ’യും മെൽവിന് ലഭിച്ചു. ദീർഘകാലം ശരീരത്തിൽ നിലനിൽക്കുന്ന മോർബില്ലി വിഭാഗത്തിൽപ്പെട്ട വൈറസുകളും മനുഷ്യരിൽ കാണപ്പെടുന്ന സബ്അക്യൂട്ട് സ്ക്ലീറോസിങ് പാനൻസ്ഫലൈറ്റിസ് എന്ന അപൂർവവും ഗുരുതരവുമായ മസ്തിഷ്കരോഗവും തമ്മിലുള്ള ബന്ധത്തെക്കുറിച്ചായിരുന്നു മെൽവിന്റെ ഗവേഷണം. മീസിൽസ് വൈറസ് ബാധയ്ക്കുശേഷം വർഷങ്ങൾ കഴിഞ്ഞ് പ്രത്യക്ഷപ്പെടാവുന്ന ഈ രോഗത്തിന്റെ കാരണങ്ങളും മൃഗങ്ങളിൽ കാണപ്പെടുന്ന സമാനമായ വൈറസ് ബാധകളുമായുള്ള ബന്ധവും ഗവേഷണത്തിൽ വിശകലനം ചെയ്തു.

മനുഷ്യരുടെയും മൃഗങ്ങളുടെയും പരിസ്ഥിതിയുടെയും ആരോഗ്യം പരസ്പരം ബന്ധപ്പെട്ടിരിക്കുന്നുവെന്ന ഏക ആരോഗ്യ സമീപനത്തിലൂടെ രോഗത്തിന്റെ തന്മാത്രാതലത്തിലുള്ള പ്രവർത്തനരീതികൾ മനസ്സിലാക്കുകയായിരുന്നു പഠനത്തിന്റെ പ്രധാന ലക്ഷ്യം. വൈറസുകൾ നാഡീവ്യവസ്ഥയിൽ ദീർഘകാലം നിലനിൽക്കുന്നതെങ്ങനെയെന്നും അവ ഗുരുതരമായ രോഗാവസ്ഥകൾക്ക് കാരണമാകുന്നതെങ്ങനെയെന്നും വ്യക്തമാക്കാൻ ഈ ഗവേഷണം സഹായിക്കുന്നു. ദക്ഷിണാഫ്രിക്കയിലെ കേപ് ടൗണിൽ നടന്ന ലോക ഏക ആരോഗ്യ സമ്മേളനത്തിലും 2026-ൽ പോർച്ചുഗലിൽ നടന്ന ലോക ഏക ആരോഗ്യ സമ്മേളനത്തിലും മെൽവിൻ ഗവേഷണപ്രബന്ധങ്ങൾ അവതരിപ്പിച്ചു.

മനുഷ്യരുടെയും മൃഗങ്ങളുടെയും ആരോഗ്യവുമായി ബന്ധപ്പെട്ട ആഗോള ഗവേഷണവേദികളിൽ തന്റെ പഠനഫലങ്ങൾ അവതരിപ്പിക്കാൻ ലഭിച്ച അവസരം മെൽവിന്റെ ഗവേഷണജീവിതത്തിലെ ശ്രദ്ധേയമായ നേട്ടമാണ്. പോർച്ചുഗലിൽ നടന്ന 2026-ലെ സമ്മേളനത്തിന്റെ ഔദ്യോഗിക പരിപാടിയിലും മെൽവിന്റെ ഗവേഷണപ്രബന്ധം ഉൾപ്പെട്ടിട്ടുണ്ട്. റോജി പോൾ ഡാനിയേലിന്റെയും നിഷാ വർഗീസിന്റെയും മകനാണ് മെൽവിൻ. റോജി പോൾ ഡാനിയേൽ കുമ്പഴ എം.പി.വി.എച്ച്.എസ്.എസിലെ ഗണിതശാസ്ത്ര അധ്യാപകനും പത്തനംതിട്ട ബ്ലോക്ക് കോൺഗ്രസ് കമ്മിറ്റി പ്രസിഡന്റുമാണ്. നിഷാ വർഗീസ് പത്തനംതിട്ട കാതോലിക്കേറ്റ് ഹയർ സെക്കൻഡറി സ്കൂളിലെ അധ്യാപികയാണ്. മിലൻ വർഗീസ് റോജി (പുഷ്പഗിരി മെഡിക്കൽ കോളേജ്, തിരുവല്ല) സഹോദരനാണ്.