എൻഎസ്എസിനെതിരായ സംഘടിത നീക്കത്തിനു പിന്നിൽ മാഫിയയെന്ന് ജി. സുകുമാരൻ നായർ

ചങ്ങനാശേരി: സാമൂഹികനീതിക്കായി എൻഎസ്എസ് എന്നും നിലകൊള്ളുമെന്ന് ജനറൽ സെക്രട്ടറി ജി. സുകുമാരൻ നായർ. മുന്നോക്ക സമുദായങ്ങൾക്ക് അർഹമായ പരിഗണന നൽകാൻ രാഷ്ട്രീയ പാർട്ടികൾ തയാറാകുന്നില്ലെന്നും മറ്റു വിഭാഗങ്ങൾക്ക് ആനുകൂല്യങ്ങൾ വാരിക്കോരി നൽകുന്ന സമീപനമാണ് പിന്തുടരുന്നതെന്നും അദ്ദേഹം ആരോപിച്ചു. 113-ാമത് വിജയദശമി നായർ മഹാസമ്മേളനത്തിലും ചങ്ങനാശേരി താലൂക്ക് യൂണിയന്റെ നവതി ആഘോഷങ്ങളുടെ ഉദ്ഘാടനച്ചടങ്ങിലും സംസാരിക്കുകയായിരുന്നു അദ്ദേഹം. മുന്നോക്ക സമുദായങ്ങളുടെ പിന്തുണയില്ലാതെയും ഭരണം നേടാമെന്ന ചിന്തയാണ് രാഷ്ട്രീയ പാർട്ടികൾക്കുള്ളതെന്ന് സുകുമാരൻ നായർ പറഞ്ഞു. സമുദായത്തിന് അർഹമായ പരിഗണന ലഭിക്കുന്നില്ലെന്ന കാര്യം രാഷ്ട്രീയ രംഗത്തുള്ള സമുദായാംഗങ്ങൾ ഗൗരവമായി മനസ്സിലാക്കണമെന്നും അദ്ദേഹം ആവശ്യപ്പെട്ടു.

എൻഎസ്എസിന്റെ പ്രവർത്തനങ്ങളെ ഇകഴ്ത്തിക്കാട്ടാൻ ചിലർ നിയമപോരാട്ടങ്ങൾ നടത്തുകയാണെന്ന് സുകുമാരൻ നായർ ആരോപിച്ചു. നിരവധി കേസുകൾ നൽകിയിട്ടും അവയിലൊന്നും എതിരാളികൾക്ക് അനുകൂലമായ ഫലമുണ്ടായിട്ടില്ലെന്നാണ് അദ്ദേഹത്തിന്റെ വാദം. കോടതികളെ എൻഎസ്എസ് സ്വാധീനിച്ചെന്ന ആരോപണങ്ങൾ സംഘടനയെ മാത്രമല്ല കോടതിയെയും അപമാനിക്കുന്നതാണെന്നും അദ്ദേഹം പറഞ്ഞു.