പെരുന്തേനരുവി ഡാമിനോട് ചേർന്നുള്ള റോഡിലേക്ക് കാടുകൾ പടർന്നുനിൽക്കുന്നത് മേഖലയിൽ യാത്രാദുരിതം സൃഷ്ടിക്കുന്നു

പെരുന്തേനരുവി : പെരുന്തേനരുവി ഡാമിനോട് ചേർന്നുള്ള റോഡിലേക്ക് ഡാമിൽ നിന്നും വാരിയ മണ്ണ് കൂട്ടിയിട്ടിരിക്കുന്നതും റോഡിലേക്ക് കാടുകൾ പടർന്നുനിൽക്കുന്നതും മേഖലയിൽ രൂക്ഷമായ യാത്രാദുരിതം സൃഷ്ടിക്കുന്നു. ഇതുവഴി കടന്നുപോകുന്ന വാഹനയാത്രക്കാരാണ് ഏറെ ബുദ്ധിമുട്ടുന്നത്. ഡാമിന് മുകളിലൂടെ മറുകര കടക്കാനെത്തുന്ന വാഹനങ്ങൾക്കും വിനോദസഞ്ചാരികളുടെ വാഹനങ്ങൾക്കും പലപ്പോഴും വഴിയരികിലെ മണ്ണുകൂനയും കാടുകളും കാരണം മുന്നോട്ട് പോകാനാവാതെ, ഏറെ ദൂരം പുറകോട്ട് വാഹനം ഓടിച്ച് മാറ്റേണ്ട ഗതികേടാണ്. മുൻപ് ഈ റോഡിൽ ഇത്തരമൊരു പ്രതിസന്ധി ഉണ്ടായിരുന്നില്ലെന്ന് പ്രദേശവാസികൾ പറയുന്നു.

പ്രളയകാലത്ത് ഡാമിൽ അടിഞ്ഞുകൂടിയ മണ്ണും ചെളിയുമാണ് വാരി റോഡിനോട് ചേർന്നുള്ള ഭാഗത്ത് നിക്ഷേപിച്ചിരിക്കുന്നത്. മഴ പെയ്യുമ്പോൾ ഈ മണ്‍കൂനയിൽ നിന്ന് ചെളി റോഡിലേക്ക് ഒലിച്ചിറങ്ങുന്നത് അപകടസാധ്യത വർദ്ധിപ്പിക്കുന്നുണ്ട്.
പെരുന്തേനരുവിയിലെത്തുന്ന നൂറുകണക്കിന് വിനോദസഞ്ചാരികൾക്ക് പുറമെ അത്തിക്കയം, കുടമുരുട്ടി, കൊച്ചുകുളം, കുരുമ്പൻമൂഴി എന്നീ മേഖലയിലുള്ള പൊതുജനങ്ങളും പ്രധാനമായി ആശ്രയിക്കുന്ന പാതയാണിത്. ബന്ധപ്പെട്ട അധികൃതർ അടിയന്തരമായി ഇടപെട്ട് റോഡിലെ മണ്ണുകൂന നീക്കം ചെയ്യാനും പടർന്നുനിൽക്കുന്ന കാടുകൾ വെട്ടിമാറ്റി ഗതാഗതം സുഗമമാക്കാനും നടപടി സ്വീകരിക്കണമെന്നാണ് നാട്ടുകാരുടെ ശക്തമായ ആവശ്യം