വേഗതയില്ലാത്തത് മൂലം കേരളത്തിലോടുന്ന ജനശതാബ്ദി ട്രെയിനുകളുടെ സൂപ്പര്‍ഫാസ്റ്റ് പദവി റെയിൽവേ പിന്‍വലിച്ചു

തിരുവനന്തപുരം: വേഗതയില്ലാത്തത് മൂലം കേരളത്തിലോടുന്ന ജനശതാബ്ദി ട്രെയിനുകളുടെ സൂപ്പര്‍ഫാസ്റ്റ് പദവി റെയിൽവേ പിന്‍വലിച്ചു. തിരുവനന്തപുരം-കണ്ണൂര്‍, തിരുവനന്തപുരം-കോഴിക്കോട് ജനശതാബ്ദി ട്രെയിനുകളുടെ സൂപ്പര്‍ഫാസ്റ്റ് പദവിയാണ് പിന്‍വലിച്ചത്. തിരുവനന്തപുരം-കണ്ണൂര്‍ ജനശതാബ്ദിയുടെ 16380/79 എന്ന പുതിയ നമ്പറും തിരുവനന്തപുരം-കോഴിക്കോട് ജനശതാബ്ദിയുടെ 16376/75 എന്ന പുതിയ നമ്പറും 2027 ജനുവരി ഒന്നിന് പ്രാബല്യത്തില്‍ വരും. സൂപ്പര്‍ഫാസ്റ്റിന് വേണ്ട ശരാശരി വേഗമായ 55 കി.മീ ഇല്ലാത്തതുകൊണ്ടാണ് ജനശതാബ്ദിയെ എക്‌സ്പ്രസാക്കി മാറ്റുന്നത്. ലോകമാന്യതിലക്-തിരുവനന്തപുരം ഗരീബ് രഥ്, എറണാകുളം-പട്‌ന ട്രെയിനുകളും ജനുവരിയില്‍ സാധാരണ എക്‌സ്പ്രസ് ട്രെയിനുകളായി മാറും.

ലോകമാന്യതിലക്-തിരുവനന്തപുരം നോര്‍ത്ത് ബൈവീക്ക്‌ലി, യശ്വന്ത്പുര-തിരുവന്തപുരം നോര്‍ത്ത് എന്നിവയുള്‍പ്പെടെ ആറ് ട്രെയിനുകളെയാണ് ഇതിനോടകം സൂപ്പര്‍ഫാസ്റ്റില്‍ നിന്ന് എക്‌സ്പ്രസായി തരംതാഴ്ത്തിയത്. സൂപ്പര്‍ഫാസ്റ്റ് സര്‍ചാര്‍ജ് ഒഴിവാകുന്നത് മൂലം ടിക്കറ്റ് നിരക്ക് കുറയുമെന്നത് യാത്രക്കാര്‍ക്ക് നേട്ടമാണ്. ദക്ഷിണ റെയില്‍വേയ്ക്ക് കീഴില്‍ മറ്റ് ഡിവിഷനുകളിലെ ആറ് എക്‌സ്പ്രസ് ട്രെയിനുകള്‍ സൂപ്പര്‍ ഫാസ്റ്റായി അപ്‌ഗ്രേഡ് ചെയ്യുന്നുണ്ട്.