മുക്കട – ഇടമൺ – അത്തിക്കയം റോഡിൽ വെള്ളക്കെട്ടിന് പരിഹാരമായി നിര്‍മ്മിച്ച ഓട ഗതാഗതത്തിന് ഭീഷണി

റാന്നി : റോഡിലെ വെള്ളക്കെട്ടിന് ശാശ്വത പരിഹാരം കാണുവാന്‍ നിര്‍മ്മിച്ച ഓട പ്രദേശവാസികൾക്കും വാഹന യാത്രക്കാർക്കും ഒരുപോലെ ഭീഷണിയാകുന്നു. മുക്കട – ഇടമൺ – അത്തിക്കയം റോഡിൽ തോമ്പിക്കണ്ടം റേഷൻ കടയ്ക്ക് സമീപമാണ് റോഡിന്റെ വശങ്ങൾ അപകടാവസ്ഥയിലായിരിക്കുന്നത്. റോഡ് ടാറിംഗ് ഉയർത്തി നിർമ്മിച്ചതിനെത്തുടർന്ന് ഈ പ്രദേശത്ത് മഴക്കാലത്ത് രൂക്ഷമായ വെള്ളക്കെട്ട് രൂപപ്പെടുന്നത് പതിവായിരുന്നു. ഇതുമൂലം കാൽനട യാത്രക്കാരും വാഹന യാത്രക്കാരും ഒരുപോലെ ദുരിതത്തിലാണ്. ഈ പ്രശ്നത്തിന് പരിഹാരമായാണ് അധികൃതർ ജെ.സി.ബി. ഉപയോഗിച്ച് റോഡിന്റെ വശങ്ങളില്‍ ഓട നിര്‍മ്മിക്കുവാന്‍ ശ്രമിച്ചത്. എന്നാൽ ഇത് വേണ്ട രീതിയിൽ പൂർത്തീകരിക്കാത്തതാണ് ഇപ്പോള്‍ പുതിയ പ്രതിസന്ധിക്ക് കാരണമായിരിക്കുന്നത്.

ഓടയുടെ വശങ്ങൾ കോൺക്രീറ്റ് ചെയ്ത്  സ്ലാബുകൾ സ്ഥാപിക്കാത്തതാണ് ഇവിടുത്തെ പ്രധാന പ്രശ്നം. റോഡിന്റെ വശങ്ങൾ ആഴത്തിൽ കുഴിച്ചിട്ടിരിക്കുന്നതിനാൽ ഇരുചക്ര വാഹനങ്ങൾക്കും കാൽനട യാത്രക്കാർക്കും  കടന്നുപോകാൻ കഴിയാത്ത സ്ഥിതിയാണ്. രാത്രികാലങ്ങളിലും മഴ സമയത്തും ഇതുവഴിയെത്തുന്ന വാഹനങ്ങൾ ഓടയിലേക്ക് മറിഞ്ഞ് വലിയ അപകടങ്ങൾ നടക്കുവാനുള്ള സാധ്യതയേറെയാണെന്ന് നാട്ടുകാർ ആശങ്കപ്പെടുന്നു. കുട്ടികളടക്കം നിരവധിയാളുകൾ ആശ്രയിക്കുന്ന ഈ റോഡിൽ എത്രയും പെട്ടെന്ന് സുരക്ഷാ മുൻകരുതലുകൾ സ്വീകരിക്കണമെന്നാണ് നാട്ടുകാരുടെ ശക്തമായ ആവശ്യം. അപകടങ്ങൾ ഒഴിവാക്കുന്നതിനായി ഓടയുടെ വശങ്ങൾ കോൺക്രീറ്റ് ചെയ്ത് ബലപ്പെടുത്തുകയും സ്ലാബുകൾ സ്ഥാപിക്കുകയും ചെയ്യണമെന്നും പ്രദേശവാസികൾ ആവശ്യപ്പെട്ടു.