ട്രെയിൻ മാ​ർഗം 34 കിലോയിലധികം കഞ്ചാവ് കടത്തിയ കേസിൽ മലപ്പുറം സ്വദേശി പിടിയിൽ

മലപ്പുറം: ട്രെയിൻ മാ​ർഗം 34 കിലോയിലധികം കഞ്ചാവ് കടത്തിയ കേസിൽ മുഖ്യ ആസൂത്രകനും വിതരണക്കാരനുമായ മലപ്പുറം സ്വദേശി പിടിയിൽ. മലപ്പുറം കല്പകഞ്ചേരി മഞ്ഞച്ചോല സ്വദേശി സുഹൈൽ കെ.പിയെയാണ് കോഴിക്കോട് റെയിൽവേ പോലീസ് പിടികൂടിയത്. കോഴിക്കോട് റെയിൽവെ പോലീസ് സ്റ്റേഷനിൽ ഓ​ഗസ്റ്റ് മാസത്തിൽ രജിസ്റ്റർ ചെയ്ത കേസിലാണ് അറസ്റ്റ്. ഓ​ഗസ്റ്റ് 23, 30 ദിവസങ്ങളിൽ ട്രെയിൻ വഴി 34 കിലോഗ്രാം കഞ്ചാവ് കടത്തിയെന്നാണ് കേസ്. ലഹരിമരുന്ന് എത്തിച്ചു നൽകാൻ പണം നൽകുകയും കേരളത്തിൽ വിതരണം നടത്തുകയും ചെയ്യുന്ന മുഖ്യകണ്ണിയാണ് പിടിയിലായ സുഹൈൽ. മാംഗ്ലൂർ സെൻട്രൽ മെയിൽ എക്സ്‌പ്രസ്സിൽ നിന്ന് 18.240 കിലോഗ്രാം കഞ്ചാവുമായി പശ്ചിമ ബംഗാൾ സ്വദേശികളായ എസ്. കെ. സുമൻ (19), ലാൽചന്ദ് ഷെയ്ഖ് (29) എന്നിവരെ ഡാൻസാഫ് സംഘത്തിന്റെ സഹായത്തോടെ കോഴിക്കോട് റെയിൽവേ പോലീസ് അറസ്റ്റ് ചെയ്തിരുന്നു.

തുടർന്ന് ഓഗസ്റ്റ് 30 നും സമാനമായ മറ്റൊരു കേസിൽ 16 കി.ഗ്രാം കഞ്ചാവുമായി മിനോട്ടി സർദാർ എന്ന സ്ത്രീയെയും അറസ്റ്റ് ചെയ്തു.  ഇതേ കേസിൽ ഇവർക്ക് ഒഡീഷയിൽ നിന്നും കഞ്ചാവ് സംഘടിപ്പിച്ചു നൽകിയ പശ്ചിമ ബംഗാൾ പൂർബ് ബർദ്ദമാൻ സ്വദേശി അബ്ദുൾ ബറാൽ (32) എന്നയാളെയും വെസ്റ്റ് ബംഗാളിൽ വെച്ച് റെയിൽവെ പോലീസ് അറസ്റ്റ് ചെയ്തിരുന്നു. നേരത്തെ പിടിയിലായ പ്രതികളെ കസ്റ്റഡിയിൽ വാങ്ങി ചോദ്യം ചെയ്തതിൽ നിന്നും ലഭിച്ച വിവരങ്ങളുടെയും പ്രതികളുടെ കോൾ ഡീറ്റെയിൽസ്, ബാങ്ക് അക്കൗണ്ട് വിവരങ്ങൾ എന്നിവയുടെയും ശാസ്ത്രീയ പരിശോധനയിലാണ് സുഹൈലിലേക്ക് അന്വേഷണം എത്തിയത്.ഒഡീഷയിൽ നിന്നും കുറഞ്ഞ വിലയ്ക്ക് കഞ്ചാവ് എത്തിക്കുന്നതിനായി അബ്ദുൾ ബറാലിന് സുഹൈൽ യു.പി.ഐ വഴി ലക്ഷക്കണക്കിന് രൂപ അയച്ചു നൽകിയതായി പോലീസ് കണ്ടെത്തി.

ഇത്തരത്തിൽ എത്തിക്കുന്ന കഞ്ചാവ് തിരൂർ മേഖലയിൽ ചെറിയ പാക്കറ്റുകളിലാക്കി ഉയർന്ന വിലയ്ക്ക് വിൽപ്പന നടത്തുകയായിരുന്നു പ്രതിയുടെ രീതി. ഇന്നലെ (നവംബർ 11) ഉച്ചയ്ക്ക് കല്പകഞ്ചേരിയിലുള്ള വീട്ടിൽ നിന്നുമാണ് പ്രതിയെ കസ്റ്റഡിയിലെടുത്ത്. വിശദമായി ചോദ്യം ചെയ്യലിൽ ഇയാൾ കുറ്റം സമ്മതിക്കുകയായിരുന്നു. പിടിയിലായ സുഹൈൽ കെ.പി. മുമ്പും നിരവധി ലഹരി-ക്രിമിനൽ കേസുകളിൽ പ്രതിയാണ്. കോഴിക്കോട് റെയിൽവെ പോലീസ് സ്റ്റേഷൻ സബ് ഇൻസ്പെക്ടർ സി.പ്രദീപ്കുമാറിൻ്റെ നേതൃത്വത്തിൽ എ.എസ്.ഐ ഷമീർ, സീനിയർ സിവിൽ പോലീസ് ഓഫീസർമാരായ ജോസ്, സജിത്ത്, സി.പി.ഒ അഖിലേഷ് , സന്ദീപ് ,റന്യ, ആർ.പി.എഫ് ഹെഡ് കോൺസ്റ്റബിൾ ബൈജു എന്നിവരാണ് പ്രതിയെ അറസ്റ്റ് ചെയ്ത് തുടർനടപടികൾ സ്വീകരിച്ചത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.