ഔഷധി ചെയർപേഴ്സണായിരിക്കെ സൗന്ദര്യ ചികിത്സ നടത്തിയെന്ന ആരോപണം തള്ളി ശോഭന ജോർജ്

തിരുവനന്തപുരം : ഇടത് സർക്കാരിന്റെ ഭരണകാലത്ത് ഔഷധി ചെയർപേഴ്സണായിരിക്കെ താൻ സൗന്ദര്യ ചികിത്സ നടത്തിയെന്ന ആരോപണം തള്ളി ശോഭന ജോർജ്. ഔഷധിയിൽ താൻ ഒരു ചികിത്സയും നടത്തിയിയിട്ടില്ലെന്നാണ് ഇതുമായി ബന്ധപ്പെട്ട് ശോഭന ജോർജ് പ്രതികരിച്ചത്. ചികിത്സ നടത്തിയെന്ന് തെളിയിക്കാൻ എന്തെങ്കിലും രേഖ ഉണ്ടെങ്കിൽ അത് പുറത്തുവിടണമെന്നും ശോഭന ജോർജ്ജ് പറഞ്ഞു. മുട്ടയും ചെമ്പരത്തി മൊട്ടും ഉപയോഗിച്ചാൽ സൗന്ദര്യം കൂടുമോ എന്നായിരുന്നു പരിഹാസ രൂപേണയുള്ള ശോഭന ജോർജിന്റെ ചോദ്യം. തനിക്ക് എതിരെ വ്യാജ ആരോപണം ഉന്നയിച്ച വിപി സജീന്ദ്രനെതിരെ സ്പീക്കർക്ക് പരാതി നൽകുമെന്നും ശോഭന ജോർജ്ജ് പറഞ്ഞു.

സംസ്ഥാന സര്‍ക്കാരിന്‍റെ പൊതുമേഖല സ്ഥാപനമായ ഔഷധിയുടെ ചെയർപേഴ്സണായിരിക്കെ ശോഭന ജോർജ് സ്ഥാപനത്തിന്റെ ചിലവിൽ സൗന്ദര്യചികിത്സ നടത്തിയതായാണ് ആരോപണം. 3 കിലോ ചെമ്പരത്തിപ്പൂമൊട്ടും കോഴിമുട്ടകളും ഉപയോ​ഗിച്ചെന്നാണ് കണ്ടെത്തൽ. ഔഷധിയുടെ പഞ്ചകർമ ആശുപത്രിയിലെ ഡീലക്സ് എസി മുറിയിൽ നടന്ന ഈ ചിട്ടവട്ടങ്ങൾക്കായി അനധികൃതമായി ഔഷധിയുടെ ഔദ്യോഗിക ഫണ്ടും ഡോക്ടർമാരുടെ സേവനവും ദുരുപയോഗം ചെയ്തുബെന്നാണ് ആഭ്യന്തര അന്വേഷണ റിപ്പോർട്ടിൽ പറയുന്നത്.