സ്കൂൾ ടൂറിനിടെ പ്രിൻസിപ്പലും പിടിഎ പ്രസിഡന്റും മദ്യപിച്ചെന്ന് ആരോപണം ; പ്രതിഷേധവുമായി രക്ഷിതാക്കൾ

കൽപ്പറ്റ : വയനാട് മീനങ്ങാടി ഹയർ സെക്കൻഡറി സ്കൂളിലെ വിനോദയാത്രയ്ക്കിടെ പ്രധാനാധ്യാപകനും പിടിഎ പ്രസിഡന്റും മദ്യപിച്ചെന്ന ആരോപണം. വിദ്യാർഥികളാണ് ഇത്തരമൊരു ആരോപണവുമായി രംഗത്തെത്തിയത്. ടൂറിനിടെ പ്രിൻസിപ്പൽ ഷിവി കൃഷ്ണനും പിടിഎ പ്രസിഡന്റ് എസ് ഹാജിസും മദ്യപിച്ചു എന്നാണ് കുട്ടികൾ ആരോപിക്കുന്നത്. ഹൈദരാബാദിലേക്കുള്ള വിനോദ യാത്രക്കിടെയായിരുന്നു സംഭവം. വിവരം പുറത്തുവന്നതോടെ പ്രതിഷേധവുമായി കുട്ടികളുടെ രക്ഷിതാക്കളും വിവിധ രാഷ്ട്രീയ-വിദ്യാർഥി സംഘടനകളും രംഗത്തെത്തി. വിനോദയാത്ര കഴിഞ്ഞ് തിരികെ സ്കൂളിൽ എത്തിയ വേളയിലാണ് സംഭവം പുറത്തുവരുന്നത്. ടൂറിനിടെ പ്രിൻസിപ്പൽ കടുത്ത മദ്യലഹരിയിലായിരുന്നുവെന്നും വിദ്യാർഥികളോടും മറ്റ് ജീവനക്കാരോടും മോശമായി പെരുമാറിയെന്നുമാണ് ഉയരുന്ന ആക്ഷേപം.

പ്രധാനാധ്യാപകന്റെ ഭാഗത്തുനിന്നുണ്ടായ ഗുരുതരമായ വീഴ്ചയ്‌ക്കെതിരെ നടപടി വേണമെന്നാവശ്യപ്പെട്ട് രക്ഷിതാക്കളും കെ.എസ്.യു, എസ്.എഫ്.ഐ, എം.എസ്.എഫ് ഉൾപ്പെടെയുള്ള വിദ്യാർഥി സംഘടനകളും രംഗത്തെത്തി. സ്കൂൾ ഓഫീസിന് മുന്നിൽ പ്രവർത്തകർ കടുത്ത മുദ്രാവാക്യം വിളികളോടെ പ്രതിഷേധിക്കുകയും പ്രിൻസിപ്പലിനെ തടഞ്ഞുവെക്കാൻ ശ്രമിക്കുകയും ചെയ്തു.