Skip to content

പദവിയിൽ കടിച്ചുതൂങ്ങാനില്ല – നിലപാടിൽ വിട്ടുവീഴ്ചയുമില്ല ; അഡ്വ.അടൂർ പ്രകാശ് 

തിരുവനന്തപുരം: പദവിയിൽ കടിച്ചുതൂങ്ങാനില്ലെന്നും ഹൈക്കമാൻഡ് തീരുമാനം എന്തായിരുന്നാലും അത് അംഗീകരിക്കുമെന്നും കോണ്‍ഗ്രസിന്റെ മുതിര്‍ന്ന നേതാവും യു.ഡി.എഫ് കൺവീനറുമായ അടൂര്‍ പ്രകാശ് എം.പി. പദവി നഷ്ടപ്പെടുമെന്ന ഭയത്തിൽ തന്റെ അഭിപ്രായങ്ങൾ പിൻവലിക്കാനോ പരാതികളിൽനിന്ന് പിന്നോട്ടുപോകാനോ തയ്യാറല്ലെന്ന ഉറച്ച നിലപാടിലാണ് അദ്ദേഹം. പദവിയോടുള്ള താൽപര്യത്തേക്കാൾ മുന്നണിയിലെ കൂട്ടായ പ്രവർത്തനത്തിനും നേതാക്കൾ തമ്മിലുള്ള കൂടിയാലോചനയ്ക്കുമാണ് പ്രാധാന്യം നൽകുന്നതെന്ന അടൂര്‍ പ്രകാശിന്റെ  നിലപാട് കോൺഗ്രസിലും യു.ഡി.എഫിലും പുതിയ രാഷ്ട്രീയ നീക്കങ്ങള്‍ക്കും ചര്‍ച്ചകള്‍ക്കും വഴിതുറന്നിരിക്കുകയാണ്. യു.ഡി.എഫ് കൺവീനര്‍ പദവിയിൽ തുടരാനായി പോരാടില്ലെന്നും അച്ചടക്കമുള്ള ഒരു കോണ്‍ഗ്രസ് പ്രവര്‍ത്തകന്‍ എന്ന നിലയില്‍ ഹൈക്കമാൻഡിന്റെ ഏതു തീരുമാനവും അനുസരിക്കുമെന്ന തന്റെ മുന്‍ നിലപാടുതന്നെയാണ് അടൂർ പ്രകാശ് ഇപ്പോഴും സ്വീകരിച്ചിരിക്കുന്നത്.

മുന്നണിയുടെ കൂട്ടായ പ്രവർത്തനവും നേതാക്കൾ തമ്മിലുള്ള ആശയവിനിമയവും ഉറപ്പാക്കേണ്ടതിന്റെ ഉത്തരവാദിത്തം ഒരു നേതാവിൽ മാത്രം നിക്ഷിപ്തമല്ല. യു.ഡി.എഫ് യോഗങ്ങൾ കൃത്യമായി ചേരുന്നുണ്ടോ, ഘടകകക്ഷികളുമായി ആവശ്യമായ ചർച്ചകൾ നടക്കുന്നുണ്ടോ, പ്രധാന തീരുമാനങ്ങൾ മുന്നണിയിലെ ഉത്തരവാദിത്തപ്പെട്ട നേതാക്കളെ അറിയിക്കുന്നുണ്ടോ തുടങ്ങിയ ചോദ്യങ്ങൾക്കാണ്  അടൂര്‍ പ്രകാശിനെ വെട്ടിയൊതുക്കുന്നതിലൂടെ ഉത്തരമില്ലാതെ പോകുന്നത്. അതേസമയം വിമർശനങ്ങൾക്ക് വ്യക്തമായ മറുപടി നൽകുകയും മുന്നണിയിലെ ഏകോപനപ്രശ്നങ്ങൾ പരിഹരിക്കുകയും ചെയ്യേണ്ട ഉത്തരവാദിത്തം മുഖ്യമന്ത്രി വി.ഡി. സതീശനുണ്ട്. പുതിയ കെ.പി.സി.സി അധ്യക്ഷനെ പ്രഖ്യാപിക്കുന്നതിനൊപ്പം യു.ഡി.എഫ് കൺവീനറെയും മാറ്റണമെന്ന ആവശ്യം വി.ഡി. സതീശനെ അനുകൂലിക്കുന്ന വിഭാഗം ഉയർത്തുമ്പോള്‍ പ്രശ്നം രൂക്ഷമാകുമെന്ന് ഉറപ്പിക്കാം. വരുംനാളുകളില്‍ വി.ഡി.സതീശനെ കാത്തിരിക്കുന്നത്  പ്രശ്നങ്ങളുടെയും പ്രതിസന്ധികളുടെയും കാലമായിരിക്കുമെന്ന കാര്യത്തില്‍ സംശയമില്ല.

മുഖ്യമന്ത്രിയും യു.ഡി.എഫ് ചെയർമാനുമായ വി.ഡി. സതീശന്റെ പ്രവർത്തനശൈലിയെക്കുറിച്ച് യു.ഡി.എഫില്‍ പലര്‍ക്കും അഭിപ്രായവ്യത്യാസമുണ്ട്. എന്നാല്‍ പലരും ഇതൊന്നും തുറന്നുപറയുന്നില്ല. യു.ഡി.എഫിന്റെ നിർണായക തീരുമാനങ്ങൾ കൺവീനറായ താൻ അറിയുന്നത് മാധ്യമങ്ങളിലൂടെയാണെന്ന അടൂർ പ്രകാശിന്റെ തുറന്നുപറച്ചിലാണ് വിവാദങ്ങൾക്ക് തുടക്കമിട്ടത്. മുസ്‌ലിം ലീഗ് നേതാവ് എം.കെ. മുനീറിനും ജി. ദേവരാജനും ക്യാബിനറ്റ് പദവിയോടെ ചുമതലകൾ നൽകിയതടക്കമുള്ള തീരുമാനങ്ങൾ തന്നോട് ആലോചിക്കാതെയാണ് കൈക്കൊണ്ടതെന്നായിരുന്നു അദ്ദേഹത്തിന്റെ പരാതി. തീരുമാനങ്ങളോട് വ്യക്തിപരമായ എതിർപ്പല്ല, മറിച്ച് മുന്നണിയുടെ ഭാഗമായുള്ള കൂടിയാലോചനയുടെ അഭാവമാണ് ചോദ്യം ചെയ്യുന്നതെന്ന് അടൂർ വ്യക്തമാക്കിയിരുന്നു.

യു.ഡി.എഫ് ചെയർമാൻ മുഖ്യമന്ത്രിയാണ്. മുന്നണി യോഗങ്ങൾ വിളിച്ചുചേർക്കുന്നതിനും ഘടകകക്ഷികൾക്കിടയിൽ ഏകോപനം ഉറപ്പാക്കുന്നതിനും ചെയർമാനും കൺവീനറും ഒരുപോലെ ഉത്തരവാദിത്തമുള്ള സംവിധാനമാണ് മുന്നണിയിലുള്ളത്. എന്നാൽ യോഗങ്ങൾ കൃത്യമായി ചേരാത്തതും പ്രധാന തീരുമാനങ്ങളിൽ കൺവീനർക്ക് വേണ്ട പങ്കാളിത്തം ലഭിക്കാത്തതും അടൂർ പ്രകാശ് ചൂണ്ടിക്കാട്ടിയ വിഷയങ്ങളാണ്. ഒക്ടോബർ 2-ന് പത്തനംതിട്ടയിൽ മാധ്യമങ്ങളോട് സംസാരിക്കവെ തന്റെ പരാതികൾ എ.ഐ.സി.സി നേതൃത്വത്തെ അറിയിക്കുമെന്ന് അദ്ദേഹം വ്യക്തമാക്കിയിരുന്നു. ഇതനുസരിച്ച് ഡല്‍ഹിയില്‍ എത്തിയ അടൂര്‍ പ്രകാശ് ദേശീയ നേതൃത്വത്തിന് മുന്നിൽ തന്റെ പ്രയാസങ്ങള്‍  തുറന്നുപറയുകയും  പരാതി നല്‍കുകയും ചെയ്തിട്ടുണ്ട്. മുന്നണിയിലെ കാര്യങ്ങൾ മാധ്യമങ്ങളിലൂടെ അറിയേണ്ടിവരുന്ന സാഹചര്യം അംഗീകരിക്കാനാകില്ലെന്നും കൺവീനർ എന്ന നിലയിൽ തനിക്ക് ലഭിക്കേണ്ട പരിഗണനയാണ് ആവശ്യപ്പെടുന്നതെന്നും അദ്ദേഹം പറഞ്ഞിരുന്നു.

യു.ഡി.എഫ് കൺവീനറുടെ ചുമതലകൾ നിർവഹിക്കാൻ ആവശ്യമായ കൂടിയാലോചനകളും വിവരങ്ങളും ലഭിക്കണമെന്ന് ആവശ്യപ്പെടുന്നത് മുന്നണിയിലെ സംഘടനാപരമായ ഉത്തരവാദിത്തത്തിന്റെ ഭാഗമാണ്. പ്രധാന തീരുമാനങ്ങൾ ആരെടുക്കണം, ആരെ അറിയിക്കണം, മുന്നണി യോഗങ്ങൾ എത്ര കൃത്യമായി നടക്കണം തുടങ്ങിയ വിഷയങ്ങളിൽ വ്യക്തമായ ധാരണയുണ്ടാകേണ്ടതുണ്ട്. ഈ വിഷയങ്ങൾ ഉന്നയിച്ചതിന്റെ പേരിൽ കൺവീനറെ മാറ്റാനുള്ള നീക്കം പുതിയ ചോദ്യങ്ങളാണ് ഉയര്‍ത്തുന്നത്. വിമർശനങ്ങൾക്ക് മറുപടി നൽകുന്നതിന് പകരം വിമർശനം ഉന്നയിച്ചയാളെ മാറ്റണമെന്ന നീക്കമാണോ നടക്കുന്നതെന്ന സംശയവും കോൺഗ്രസ് രാഷ്ട്രീയത്തിൽ ഉയരുന്നുണ്ട്. ഇതിന് ഹൈക്കമാൻഡിന്റെ നിലപാടാണ് നിർണായകമാകുക.

പദവി നിലനിർത്താൻ ആരുടെയും മുന്നിൽ വഴങ്ങില്ലെന്നും ഹൈക്കമാൻഡ് തീരുമാനിക്കുന്ന ഏത് മാറ്റവും അംഗീകരിക്കുമെന്നും അടൂർ പ്രകാശ് വ്യക്തമാക്കിയിട്ടുണ്ട്. എന്നാൽ അദ്ദേഹം ഉന്നയിച്ച പ്രധാന ചോദ്യങ്ങൾ ഇപ്പോഴും പ്രസക്തമാണ്: കൺവീനർക്ക് മുന്നണി തീരുമാനങ്ങളിൽ പങ്കാളിത്തമുണ്ടോ? ഘടകകക്ഷികളുമായി ആവശ്യമായ കൂടിയാലോചനകൾ നടക്കുന്നുണ്ടോ? മുന്നണി യോഗങ്ങൾ കൃത്യമായി വിളിച്ചുചേർക്കാൻ ചെയർമാൻ നടപടി സ്വീകരിക്കുന്നുണ്ടോ? ഈ ചോദ്യങ്ങൾക്ക് വ്യക്തമായ മറുപടി നൽകേണ്ടത് മുഖ്യമന്ത്രി വി.ഡി. സതീശനും യു.ഡി.എഫ് നേതൃത്വവുമാണ്. അടൂർ പ്രകാശിന്റെ പദവി മാറ്റുന്നതുകൊണ്ട് മാത്രം മുന്നണിയിലെ ഏകോപനപ്രശ്നങ്ങൾക്ക് പരിഹാരമാകില്ലെന്ന വിലയിരുത്തലും കോൺഗ്രസ് രാഷ്ട്രീയത്തിൽ ഉയരുന്നുണ്ട്.

Have news from your area?

WhatsApp or email the news desk.

75104 53033 ptamedianews@gmail.com

Most read

  1. കേരളത്തെ നടുക്കിയ കോന്നി പോപ്പുലർ ഫിനാൻസ് തട്ടിപ്പ് : 30,000-ത്തിലധികം നിക്ഷേപകർ – 1,600 കോടിയുടെ തട്ടിപ്പ് – 12,000 ക്ലെയിമുകൾക്ക് നിക്ഷേപത്തിന്റെ 25 ശതമാനം ലഭിക്കാന്‍ വഴിയൊരുങ്ങുന്നു

  2. 49 NBFCകളുടെ രജിസ്ട്രേഷൻ റദ്ദാക്കി : കര്‍ശന നടപടിയുമായി റിസർവ് ബാങ്ക്

  3. അമ്പലപ്പുഴ പുറക്കാട്ട് ആള്‍താമസമില്ലാത്ത വീട്ടിലെ മോഷണ ശ്രമം വിദേശത്തിരുന്ന് വീട്ടുടമ പൊളിച്ചു

  4. ക്വാഡ് ഉച്ചകോടിയിൽ സ്ഥാനം അടയാളപ്പെടുത്താൻ തറയിൽ പതിച്ച ഇന്ത്യൻ പതാക കാർഡ് പോക്കറ്റിൽ സൂക്ഷിച്ച് പ്രധാനമന്ത്രി

  5. നിധി കമ്പനികളുടെ പേരിൽ നിക്ഷേപ തട്ടിപ്പിന് സാധ്യത ; ഇന്ത്യയില്‍ അംഗീകാരമുള്ളത് 395 കമ്പനികള്‍ക്ക് മാത്രം – പൊതുജനങ്ങൾക്ക് കേന്ദ്ര സർക്കാരിന്റെ മുന്നറിയിപ്പ്

Share on WhatsApp

Share this story

പദവിയിൽ കടിച്ചുതൂങ്ങാനില്ല – നിലപാടിൽ വിട്ടുവീഴ്ചയുമില്ല ; അഡ്വ.അടൂർ പ്രകാശ്  pathanamthittamedia.com