വീണ്ടും കോൺ​ഗ്രസിനെ വെട്ടിലാക്കി മുതിര്‍ന്ന നേതാവ് കെ സുധാകരൻ

കണ്ണൂർ: വീണ്ടും കോൺ​ഗ്രസിനെ വെട്ടിലാക്കി മുതിര്‍ന്ന നേതാവ് കെ സുധാകരൻ. ഒരു ന്യായവുമില്ലാതെയാണ് കെപിസിസി അധ്യക്ഷ സ്ഥാനത്ത് നിന്ന് മാറ്റിയതെന്നും അതിൽ ദുഃഖമുണ്ടാക്കിയെന്നും സുധാകരൻ തുറന്നടിച്ചു. പാര്‍ട്ടിക്ക് വേണ്ടി രക്തം ചീന്തിയവരുടെ വിയര്‍പ്പിനെ വില കുറച്ചു കാണുന്ന പ്രവൃത്തി ഗുണം ചെയ്യില്ല. സര്‍ക്കാരിന്‍റെ തെറ്റ് ചൂണ്ടിക്കാട്ടാന്‍ ഭരണപക്ഷത്തിന്‍റെ ഉള്ളിലും ആർജ്ജവമുണ്ടാകണം എന്നും അദ്ദേഹം പറഞ്ഞു. സര്‍ക്കാരിന് ആവശ്യമുള്ളത് സ്തുതി പാഠകരെയല്ല, തെറ്റ് ചൂണ്ടിക്കാട്ടുന്ന പോരാളികളെയാണ്.

കണ്ണൂരില്‍ താനും പ്രവര്‍ത്തകരും അനുഭവിച്ച യാതന ചില്ലറയല്ലെന്നും അടിപതറി നിന്ന കോൺ​ഗ്രസിനെ വിജയങ്ങളിലേക്ക് നയിച്ചയാളാണ് താനെന്നും സുധാകരൻ പറഞ്ഞു. നിലപാട് തുറന്നു പറയാന്‍ അവകാശം തനിക്കുണ്ട്. അധികാരത്തേക്കാള്‍ വലുതാണ് ആദര്‍ശം. നിലപാടുകളുടെ പേരില്‍ തന്നോട് വിയോജിപ്പുണ്ടാകാം. സ്ഥാനങ്ങളേക്കാള്‍ വലുതാണ് പ്രസ്ഥാനമെന്നും അക്രമ രാഷ്ട്രീയത്തോട് തന്‍റെ നിലപാടില്‍ മാറ്റമില്ലെന്നും സുധാകരൻ വ്യക്തമാക്കി.