വടശ്ശേരിക്കരയിൽ കാട്ടാന ശല്യം രൂക്ഷം : ലക്ഷങ്ങൾ മുടക്കി സ്ഥാപിച്ച എ.ഐ. ക്യാമറകളും സോളാർ വേലികളും നോക്കുകുത്തിയാകുന്നു

വടശ്ശേരിക്കര : ഒരിടവേളയ്ക്ക് ശേഷം വടശ്ശേരിക്കരയിലെ ജനവാസ മേഖലകളിൽ കാട്ടാനകളുടെ ശല്യം വീണ്ടും രൂക്ഷമാകുന്നു. റാന്നി ഫോറസ്റ്റ് ഡിവിഷന്റെ നേതൃത്വത്തിൽ നബാർഡിന്റെ  ധനസഹായത്തോടെ റാന്നി താലൂക്കിൽ വടശ്ശേരിക്കര ഒളികല്ലിൽ സ്ഥാപിച്ച ആർട്ടിഫിഷ്യൽ ഇന്റലിജൻസ് ക്യാമറ സംവിധാനത്തിനും അലാറത്തിനും കാട്ടാനകളുടെ സാന്നിധ്യം തിരിച്ചറിയുവാന്‍ കഴിയാത്തത് നാട്ടുകാരിൽ ആശങ്കയും പ്രതിഷേധവും ഉയര്‍ത്തിയിട്ടുണ്ട്. ലക്ഷക്കണക്കിന് രൂപ മുടക്കി സ്ഥാപിച്ച എ.ഐ. ക്യാമറകളുടെയും സോളാർ വേലികളുടെയും പ്രവർത്തനക്ഷമതയാണ് ഇപ്പോൾ ചോദ്യം ചെയ്യപ്പെടുന്നത്. എ.ഐ. ക്യാമറകൾക്ക് തൊട്ടടുത്തുകൂടി കാട്ടാനകൾ നടന്നുപോകുന്നതിന്റെ ദൃശ്യങ്ങൾ പുറത്തുവന്നതോടെയാണ് സംവിധാനത്തിലെ പാളിച്ചകൾ ചര്‍ച്ചയാകുന്നത്.

ക്യാമറകളുണ്ടായിട്ടും സമയബന്ധിതമായി അലാറം മുഴങ്ങുകയോ വനംവകുപ്പിന് മുന്നറിയിപ്പ് ലഭിക്കുകയോ ചെയ്യാത്തത് വലിയ വീഴ്ചയാണെന്ന് നാട്ടുകാർ ചൂണ്ടിക്കാണിക്കുന്നു. വന്യജീവി ആക്രമണങ്ങളിൽ നിന്നും ജനവാസ മേഖലകളെ സംരക്ഷിക്കുവാനായി നടപ്പിലാക്കിയ സോളാർ വേലികളും ആധുനിക ക്യാമറ സംവിധാനങ്ങളും ആർക്കുവേണ്ടിയായിരുന്നു എന്ന ചോദ്യമാണ് ഇപ്പോൾ ജനങ്ങളില്‍ നിന്നും ഉയരുന്നത്. വലിയ തുക ചെലവഴിച്ച് നടപ്പിലാക്കുന്ന ഇത്തരം പദ്ധതികൾ നോക്കുകുത്തിയായി മാറുന്നത് വകുപ്പിന്റെ  അനാസ്ഥയാണെന്ന് പരക്കെ ആക്ഷേപമുണ്ട്. വടശ്ശേരിക്കര, ഒളികല്ല് പ്രദേശങ്ങളിലെ ജനവാസ കേന്ദ്രങ്ങളിലേക്ക് കാട്ടാനകൾ കൂട്ടത്തോടെ എത്തുന്നത് ജനങ്ങളുടെ ഉറക്കം കെടുത്തുകയാണ്.

കൃഷിയിടങ്ങൾ നശിപ്പിക്കുന്നതിനൊപ്പം മനുഷ്യന്റെ  ജീവനും സ്വത്തിനും ഭീഷണിയാകുന്ന കാട്ടാനകളെ തുരത്തുവാന്‍ അടിയന്തിര നടപടികൾ സ്വീകരിക്കണമെന്ന് പ്രദേശവാസികൾ ആവശ്യപ്പെടുന്നു. ജനങ്ങളുടെ ജീവന് സംരക്ഷണം ഉറപ്പാക്കുവാന്‍ വനം വകുപ്പ് അടിയന്തിരമായി ഇടപെടണമെന്നും സാങ്കേതിക തകരാറുകൾ പരിഹരിച്ച് എ.ഐ. ക്യാമറ സംവിധാനം കാര്യക്ഷമമാക്കണമെന്നുമാണ് നാട്ടുകാരുടെ ശക്തമായ ആവശ്യം. അല്ലാത്ത പക്ഷം ശക്തമായ സമരപരിപാടികളിലേക്ക് കടക്കുമെന്നും നാട്ടുകാർ മുന്നറിയിപ്പ് നല്‍കി.