ശബരിമല – മണ്ഡലകാലം ആരംഭിക്കുവാന്‍ ദിവസങ്ങള്‍ മാത്രം ബാക്കി : പമ്പ – ളാഹ റോഡിലെ അപകടകരമായ മരച്ചില്ലകള്‍ മുറിച്ചുമാറ്റിയില്ല

പമ്പ : ശബരിമല തീര്‍ത്ഥാടനം ആരംഭിക്കുവാന്‍ ദിവസങ്ങള്‍ മാത്രം ബാക്കി നില്‍ക്കുമ്പോള്‍ പ്രധാന പാതയായ പമ്പ – ളാഹ റോഡിലേക്ക് ചാഞ്ഞുനില്‍ക്കുന്ന മരച്ചില്ലകളും ഈറ്റത്തലപ്പുകളും വെട്ടിമാറ്റാത്തത്‌ അപകട ഭീഷണിയാകുന്നു. വനപാതയായതിനാല്‍ സീസണ്‍ അല്ലാത്ത സമയങ്ങളില്‍ കാട്ടാനകള്‍ ഈറ്റത്തലപ്പുകള്‍ റോഡിലേക്ക് ഒടിച്ചിടുന്നത് പതിവാണ്. ഇത് എല്ലാ വര്‍ഷവും വനം വകുപ്പ് വെട്ടിമാറ്റാറുണ്ടെങ്കിലും ഇത്തവണ ഇത്തരം ജോലികള്‍ പൂര്‍ത്തിയാക്കിയില്ലെന്നാണ് ആക്ഷേപം. നിരവധി കെ.എസ്.ആര്‍.ടി.സി. ബസുകളാണ് സീസണ്‍ സമയത്ത് ഈ റോഡിലൂടെ സര്‍വീസ് നടത്തുന്നത്.  മരച്ചില്ലകളും ഈറ്റത്തലപ്പുകളും റോഡിലെ  വളവുകളിലേക്ക് ചാഞ്ഞുനില്‍ക്കുന്നത് യാത്രക്കാര്‍ക്ക് വലിയ അപകട ഭീഷണിയായി മാറുകയാണ്.

വാഹനങ്ങള്‍ സഞ്ചരിക്കുമ്പോള്‍ ഇത് അയ്യപ്പ ഭക്തരുടെ ദേഹത്ത് തട്ടി മുറിയുന്നതിനും കാരണമായേക്കാം. മരത്തിന്റെ  ഉണങ്ങിയ ചില്ലകളും അപകടക്കെണിയായി മാറിയിട്ടുണ്ട്. കാറ്റടിക്കുമ്പോള്‍ ഈ ചില്ലകള്‍ പലപ്പോഴും റോഡിലേക്ക് ഒടിഞ്ഞുവീഴുന്നതും അയ്യപ്പ ഭക്തര്‍ക്ക് ഭീഷണിയായി മാറുന്നുണ്ട്. പമ്പ – ളാഹ റോഡ്‌ അടുത്തടുത്തായി വലിയ വളവുകള്‍ നിറഞ്ഞതായതിനാല്‍ റോഡിലേക്ക് ചാഞ്ഞുനില്‍ക്കുന്ന മരച്ചില്ലകള്‍ പലപ്പോഴും ശ്രദ്ധയില്‍പ്പെടണമെന്നില്ല. രാത്രിയില്‍ ഈ വഴിയുള്ള യാത്രയും അപകടങ്ങള്‍ക്ക് കാരണമായി മാറിയേക്കാം. പമ്പ – ളാഹ റോഡിലേക്ക് ചാഞ്ഞുനില്‍ക്കുന്ന മരച്ചില്ലകളും ഈറ്റത്തലപ്പുകളും എത്രയും വേഗം നീക്കം ചെയ്യുവാന്‍ അധികൃതര്‍ അടിയന്തിര നടപടി സ്വീകരിക്കണമെന്നും അയ്യപ്പ ഭക്തര്‍ ആവശ്യപ്പെടുന്നു.