കഴിഞ്ഞ 12 വർഷമായി കേന്ദ്രത്തിന്റേത് പൊള്ളയായ വാഗ്ദാനങ്ങൾ മാത്രം ; വായുമലിനീകരണ വിഷയത്തിൽ ഖാർഗെയുടെ കടുത്ത വിമർശനം

ന്യൂഡൽഹി: ദേശീയ തലസ്ഥാനത്ത് വായുമലിനീകരണം രൂക്ഷമാകുന്ന പശ്ചാത്തലത്തിൽ ബി.ജെ.പി. സർക്കാരിനെതിരേ രൂക്ഷവിമർശനവുമായി കോൺഗ്രസ് അധ്യക്ഷൻ മല്ലികാർജുൻ ഖാർഗെ. വായുമലിനീകരണത്തിൽ രാജ്യം ‘വിശ്വഗുരു’ ആകുന്നത് എന്തുകൊണ്ടാണെന്ന് ചോദിച്ച അദ്ദേഹം, മലിനീകരണ പ്രശ്ന‌ം പരിഹരിക്കുന്നതിൽ മോദി സർക്കാർ പേരിനുമാത്രമുള്ള നടപടികളാണ് സ്വീകരിക്കുന്നതെന്നും ആരോപിച്ചു.ശുദ്ധമായവായു എന്നത് ഒരു മൗലികാവകാശമാണെന്നും അത് സർക്കാർ നൽകുന്ന ഔദാര്യമല്ലെന്നും എക്സിലെ കുറിപ്പിൽ ഖാർഗെ വ്യക്തമാക്കി. “എന്തുകൊണ്ടാണ് നമ്മൾ വായുമലിനീകരണത്തിൽ ഒരു ‘വിശ്വഗുരു’വായി മാറുന്നത്? വെറും നാമമാത്രമായ നടപടികളും പി.ആർ. സ്റ്റണ്ടുകളും പാലിക്കാത്ത വാഗ്ദാനങ്ങളും പരസ്പ്‌പരം കുറ്റപ്പെടുത്തലുകളുമാണ് ബി.ജെ.പിയുടെ മുഖമുദ്രയായി മാറിയിരിക്കുന്നത്,” എക്‌സിൽ പങ്കുവെച്ച കുറിപ്പിൽ ഖാർഗെ വ്യക്തമാക്കി.

കഴിഞ്ഞവർഷം, വായുഗുണനിലവാര സൂചിക നിരീക്ഷണ കേന്ദ്രങ്ങൾക്ക് ചുറ്റും വാട്ടർ ടാങ്കറുകൾ ഉപയോഗിച്ച് വെള്ളം തളിച്ചിരുന്നു. അതുവഴി മലിനീകരണ കണക്കുകൾ ‘കഴുകിക്കളയാനാ’യിരുന്നു ശ്രമം. എന്നാൽ, ഇത്തവണ മലിനീകരണം ഉച്ചസ്ഥായിയിലായപ്പോൾ ഡൽഹിയിലെ 59 നിരീക്ഷണ കേന്ദ്രങ്ങളിൽ 36 എണ്ണത്തിൽനിന്നും പി.എം. 2.5 റീഡിങ്ങുകൾ അപ്രത്യക്ഷമായതായി അദ്ദേഹം ആരോപിച്ചു.കഴിഞ്ഞ 12 വർഷമായി പ്രധാനമന്ത്രി നരേന്ദ്ര മോദി വായുമലിനീകരണ വിഷയത്തിൽ വാക്കുകൾകൊണ്ട് മാത്രമാണ് നടപടിയെടുത്തത്. 2019 മേയ് എട്ടിന് പ്രധാനമന്ത്രി മോദി ഇതൊരു വെല്ലുവിളിയായി പ്രഖ്യാപിച്ചു. പക്ഷേ, അദ്ദേഹത്തിന്റെ സർക്കാർ ഒരു നടപടിയും സ്വീകരിച്ചില്ല. ഡൽഹി-ദേശീയ തലസ്ഥാന പ്രദേശം മുതൽ ഉത്തർപ്രദേശ്, ബിഹാർ, ഹരിയാന, പഞ്ചാബ്, രാജസ്ഥാൻ വരെയുള്ള ജനങ്ങൾ ശുദ്ധവായു കിട്ടാതെ ശ്വാസംമുട്ടുകയാണ്. രാജ്യത്തിന് ‘ഹവ കാ ഹിസാബ്’ നൽകാൻ മോദിജി ധൈര്യം കാണിക്കുമോയെന്നും ഖാർഗെ ചോദിച്ചു.