സ്കൂളുകളിൽ കൗൺസിലിങ് നിർബന്ധമാക്കി ഗുജറാത്ത് സർക്കാർ

അഹമ്മദാബാദ് : വിദ്യാർത്ഥികളുടെ സമ്മർദ്ദം പരിഹരിക്കുന്നതിനും ആത്മഹത്യകൾ തടയുന്നതിനുമുള്ള ശ്രമങ്ങളുടെ ഭാഗമായി, സെക്കൻഡറി, ഹയർ സെക്കൻഡറി സ്കൂളുകളിൽ മാനസികാരോഗ്യ പിന്തുണാ സംവിധാനങ്ങൾ നിർബന്ധമാക്കുന്ന പുതിയ നിയന്ത്രണങ്ങളുമായി ഗുജറാത്ത് സർക്കാർ. സമർപ്പിത വെൽനസ് ടീമുകൾ, പിയർ-സപ്പോർട്ട് സിസ്റ്റങ്ങൾ, യോഗ്യതയുള്ള കൗൺസിലർമാർ എന്നിവ ഇതിൽ ഉൾപ്പെടുന്നു. പരീക്ഷാ സമ്മർദം, മാർക്കിനായുള്ള മത്സരം, സോഷ്യൽ മീഡിയ ഉപയോഗം, കുടുംബത്തിന്റെ പ്രതീക്ഷകൾ എന്നിവ മൂലമുള്ള മാനസിക പ്രതിസന്ധികൾ ലഘൂകരിക്കുന്നതിന്റെ ഭാഗമായാണ് നടപടി.

ഗുജറാത്ത് സെക്കൻഡറി ആൻഡ് ഹയർ സെക്കൻഡറി എജ്യുക്കേഷൻ റെഗുലേഷൻസ് 1974 പ്രകാരമാണ് പുതിയ ചട്ടങ്ങൾ. ജിഎസ്എച്ച്എസ്ഇബിയുമായി അഫിലിയേറ്റ് ചെയ്തിട്ടുള്ള 9 മുതൽ 12 വരെ ക്ലാസുകളുള്ള സ്കൂളുകൾക്കാണ് ചട്ടം ബാധകം. സുപ്രീംകോടതിയുടെ മാനസികാരോഗ്യ മാർഗനിർദേശങ്ങളും, എൻസിഇആർടി തയാറാക്കിയ ഉമ്മീദ് മാർഗനിർദേശങ്ങളും അടിസ്ഥാനമാക്കിയാണ് പുതിയ ചട്ടങ്ങൾ തയാറാക്കിയിരിക്കുന്നത്.