​’ആം ആദ്മി മുങ്ങുന്ന കപ്പൽ’; 3 എം.എൽ.എമാർ ബി.ജെ.പിയിൽ ചേർന്നതിന് പിന്നാലെ രൂക്ഷ പരിഹാസവുമായി പഞ്ചാബ് കോൺഗ്രസ്

ചണ്ഡിഗഢ്: മൂന്ന് സിറ്റിങ് എംഎല്‍എമാര്‍ ബിജെപിയില്‍ ചേര്‍ന്നതില്‍ ആം ആദ്മി പാര്‍ട്ടി (എഎപി)ക്കെതിരെ പരിഹാസവുമായി പഞ്ചാബ് കോണ്‍ഗ്രസ് അധ്യക്ഷന്‍ പർഗത് സിംഗ്. മുഖ്യമന്ത്രി ഭഗവന്ത് മന്നിന്റെ നേതൃത്വത്തിലുള്ള സര്‍ക്കാര്‍ ദുര്‍ബലമാകുന്നതിന്റെ പ്രകടമായ സൂചനയാണെന്നും പർഗത് സിംഗ് പറഞ്ഞു. ആം ആദ്മി പാര്‍ട്ടി ബിജെപിയ്ക്ക് വഴിയൊരുക്കുകയാണെന്നും കേന്ദ്ര അന്വേഷണ ഏജന്‍സികളെ ഉപയോഗിച്ച് രാഷ്ട്രീയ എതിരാളികളെ ഭയപ്പെടുത്താന്‍ അവര്‍ ശ്രമിക്കുന്നതായും അദ്ദേഹം ആരോപിച്ചു.

എഎന്‍ഐയോട് സംസാരിക്കുകയായിരുന്നു പഞ്ചാബ് പിസിസി അധ്യക്ഷന്‍.’ഇത് മുങ്ങിക്കൊണ്ടിരിക്കുന്ന കപ്പലാണ്. അവര്‍ ബിജെപിക്ക് വഴിയൊരുക്കുകയാണ്. ഇഡി റെയ്ഡുകളും സിബിഐ റെയ്ഡുകളും കാണിച്ച് ഇവര്‍ ഭയപ്പെടുത്താന്‍ ശ്രമിക്കുകയാണ്. എന്റെ നേതാക്കളോട് എനിക്ക് ഒന്നേ പറയാനുള്ളൂ, ധീരമായി പോരാടുക. ഇത് ഭയപ്പെടുത്താനും ഭീഷണിപ്പെടുത്താനുമുള്ള വെറും തന്ത്രം മാത്രമാണ്,’ സിംഗ് പറഞ്ഞു.