ബൈക്കിന് സൈഡ് കൊടുക്കാത്തതിലെ വിരോധം ; കെ എസ് ആർ ടി സി ബസ്സിന്റെ ചില്ല് തകർത്തയാൾ റിമാൻഡിൽ

റാന്നി : യുവാക്കൾ സഞ്ചരിച്ച ബൈക്കിന് സൈഡ് കൊടുക്കാത്തതിലെ വിരോധത്തിൽ കെ എസ് ആർ ടി സി ബസ്സിന്റെ ചില്ല് തകർത്തയാൾ റിമാൻഡിൽ. റാന്നി അങ്ങാടി കരിങ്കുറ്റി സ്വദേശി മണിമലേത്ത് കാലായിൽ നിതിൻ ലെജു (21) ആണ് അറസ്റ്റിൽ ആയത്. സെപ്റ്റംബർ അഞ്ചാം തീയതി രാവിലെയാണ് റാന്നി ഡിപ്പോയിലെ കെ എസ് ആർ ടി സി ബസിന്റെ പിൻഭാഗത്തെ ചില്ല് തകർത്ത നിലയിൽ കണ്ടെത്തിയത്. ജീവനക്കാരുടെ പരാതിയിൽ എട്ടാം തീയതി കേസ് രജിസ്റ്റർ ചെയ്തു. പ്രതിയെക്കുറിച്ച് പ്രാഥമികമായി യാതൊരു സൂചനയും ഇല്ലാതിരുന്നത് അന്വേഷണ സംഘത്തിന് വെല്ലുവിളിയായി. നിരവധി സിസിടിവി ദൃശ്യങ്ങൾ ഉൾപ്പെടെ പരിശോധിച്ച പോലീസ് സംശയമുള്ള നിരവധി പേരെ ചോദ്യം ചെയ്തു.

തുടർന്ന് സംഭവ ദിവസം കെഎസ്ആർടിസി പരിസരത്ത് പ്രതിയുടെ സാന്നിധ്യം മനസ്സിലാക്കിയ പോലീസ് ഇയാളിലേക്ക് എത്തിച്ചേരുകയായിരുന്നു. ചോദ്യം ചെയ്യലിൽ ഇയാൾ പോലീസിനോട് കുറ്റസമ്മതം നടത്തി. പ്രതിയും സുഹൃത്തും ഒരുമിച്ച് യാത്ര ചെയ്തപ്പോൾ ഏതോ കെഎസ്ആർടിസി ബസ് സൈഡ് കൊടുക്കാനുള്ള വിരോധം മൂലമാണ് ഇപ്രകാരം ചെയ്തതെന്ന് പ്രതി പറഞ്ഞു. എസ്.ഐ എസ് സിബി, സി.പിഓമാരായ എം.എൻ അഞ്‌ജെലോ , പി. പ്രദീപ്‌, പ്രസാദ് എന്നിവർ അടങ്ങിയ സംഘമാണ് പ്രതിയെ അറസ്റ്റ് ചെയ്തത്. റാന്നി ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.